Gjykata e Tropojës ka lënë në burg 3 qytetarë, që morën pjesë në protestat para KZAZ duke kërkuar lirimin e ambienteve, pas shkresës së kryetarit të Bashkisë, Besnik Dushaj.
Pas vendimit të gjykatës, qytetarët e Tropojës kanë protestuar, ndërsa kërkonin lirimin e të arrestuarve.
Sipas protestuesve, vendimi i gjykatës për të lënë në burg protestuesit është marrë nën presionin e Edi Ramës, ndërsa të arrestuarit janë cilësuar politikë.
Kryetari i Bashkisë së Tropojës Besnik Dushaj përmes rrjetev sociale i ka drejtuar një thirrje qytetarëve për të marrë pjesë në protestën e sotme.
“Thirrja ime, thirrja e çdo njeriu që mbron lirinë dhe demokracinë e vendit të tij, është për bashkimin më të madh që Shqipëria ka parë ndonjëherë, ditën e sotme në orën 20:00, në bulevardin “Dëshmorët e Kombit”, për t’i dhënë përgjigjen e merituar kësaj klike kriminale që po instalon diktaturën”, shkruan Dushaj.
Postimi i Besnik Dushajt
Ditën e sotme, Gjykata e Tropojës, nën presionin e qeverisë kriminale të “Rilindjes”, dha vendimin e burgosjes politike për tre protestues të pafajshëm, Amarildo Gecaj, Ndriçim Ndrepepaj dhe Arbër Ulndreaj, që u ngritën në mbrojtje të lirisë dhe demokracisë, në mbrojtje të Kushtetutës së Republikës së Shqipërisë.
Thirrja ime, thirrja e çdo njeriu që mbron lirinë dhe demokracinë e vendit të tij, është për bashkimin më të madh që Shqipëria ka parë ndonjëherë, ditën e sotme në orën 20:00, në bulevardin “Dëshmorët e Kombit”, për t’i dhënë përgjigjen e merituar kësaj klike kriminale që po instalon diktaturën.
Shqipëria e NATO-s, Shqipëria e lëvizjes së lirë, Shqipëria e demokracisë që pret të bëhet pjesë BE-së nuk mund dhe nuk do të nënshtrohet, nuk mund dhe nuk do të kthehet pas në vitet e errëta të diktaturës. Detyra jonë, detyra e çdo qytetari të Republikës së lirë dhe demokratike të Shqipërisë, është mbrojtja e këtyre vlerave të fituara me kaq mund. Ne duhet dhe do ja dalim! E drejta do triumfojë mbi padrejtësinë, liria do triumfojë mbi diktaturën! Fitore!
