Rama dhe Meta bihen dakord parimisht se “demokracia s’mund të negociohen”, megjithatë qasjet janë të ndryshme…
Në një intervistë për “Radion Evropa e Lirë”, Rama tha se Shqipëria do të shkojë në zgjedhje me 30 qershor, edhe pse opozita dhe presidenti Ilir Meta thonë se mbajtja e tyre është anuluar.
I pyetur nëse ‘keni një ofertë për opozitën’ për zgjidhjen e krizës politike, Rama tha: “Unë kam insistuar për dialog gjithmonë, kamë bërë të gjitha përpjekjet për dialog. E vetmja gjë që nuk mund të negociohet është demokracia. Dhe patjetër s’mund të negociohen dhe afatet kur populli duhet të marri fjalën. Këto janë të panegociueshme, gjithçka tjetër është e negociueshme”.
Zëdhënësi i Presidentit Meta, Tedi Blushi i pyetur nga “RTV Ora” për një reagim lidhur me deklaratat e bëra nga Edi Rama për “Radio Europa e Lirë”, është shprehur se është dakord me qëndrimin e kryeministrit.
“Shumë dakord me kryeministrin. Zgjedhjet nuk janë të politikanëve, por të popullit. Demokracia dhe pluralizmi politik janë të panegociueshme,”-tha ai.
Ndërsa Rama i qëndron 30 qershorit si datë për zgjedhjet lokale, Meta është shprehur prerë se dekreti i tij është në fuqi dhe zgjedhje më 30 qershor nuk do të ketë. /BN/
