Nga Boldnews.al
Ish-deputeti i Partisë Demokratike, Bardh Spahia, u shoqërua mbrëmjen e së Mërkurës nga Policia e Tiranës dhe më tej u ndalua, pas ngjarjeve që ndodhën të Martën në Shkodër, ku u dëmtuan ambjentet e Komisionin Zonal të Administrimit Zgjedhor nr.3.
Sipas proces-verbalit të “ndalimit me iniciativë” të Policisë Gjyqësore, ish-deputeti Spahia dyshohet për kryerjen e disa veprave penale, ndër të cilat “Kundërshtim i forcave policore”; “shkatërrimi i pronës me zjarr”; dhe “dëmtim i materialeve zgjedhore”.
Në këtë proces-verbal, ish-deputeti Spahia ka deklaruar se “nuk pranoj asnjë akuzë, të cilat i konsideroj të pavërteta”.
Përtej argumentave të kundërta mes palëve, ka një element thelbësor formal, i cili provon se ndalimi i ish-deputetit Bardh Spahia është kryer për motive që kalojnë aspektin ligjor.
Dokumenti ka që në krye të tij titullin: “Proces-verbal për ndalimin me iniciativë nga Policia Gjyqësore të shtetasit Bardh Spahia”.
Pra, Policia Gjyqësore e Policisë së Tiranës ka kryer ndalimin “me iniciativë”. Ky veprim parashikohet në nenin 253, ku thuhet se: “Policia gjyqësore kryen ndalimin me iniciativën e vet kur nuk është e mundur, për shkak të gjendjes së ngutshme, të pritet urdhri i prokurorit”.
Pra, Policia Gjyqësore kryen ndalimin e një shtetasi me iniciativë në rastet kur situata është e ngutshme dhe kur nuk mund të pritet urdhëri i prokurorit.
Por, a ishte situata e tillë në momentin e ndalimit të ish-deputetit Bardh Spahia? Faktet tregojnë që jo.
Kushti i parë-gjendja e ngutshme?
Paraditen e së Mërkurës, media shpërndau informacionin se ishte shpallur në kërkim policor ish-deputeti Spahia, për ngjarjet e ndodhura një ditë më parë në Shkodër.
Mbrëmjen e së Martës, deputeti Spahia, pasi kishte qenë gjatë gjithë ditës në Tiranë dhe i pakontaktuar nga Policia, udhëton drejt televizionit Top Channel, për të qenë pjesë e panelit në emisionin “Open”, i cili kishte nisur transmetimin e tij. Lëvizja e Spahiut nga selia e PD deri në Top Channel transmetohej drejtëpërdrejtë nga një kamera e televizionit, e cila e shoqëronte në automjet.
Rrugës, pasi ishte mësuar se Bardh Spahia po lëvizte drejt Top Channel, një patrullë policore e ndalon dhe e shoqëron në ambjentet e Policisë së Tiranës.
Pra, nga e gjithë dinamika, e parë drejtëpërdrejtë në media, nuk duket asnjë element që të dëshmojnë për “veprimet e ngutshme” nga ana e Policisë. Uniformat blu, të orientuar nga eprorët e tyre, kanë mësuar se Bardh Spahia po udhëtonte nën syrin e kamerave nga selia e PD drejt Top Channel.
Nëse ish-deputeti do të kërkonte t’i fshihej autoriteteve ligjzbatuese, nuk do të ndërmerrte veprime në sytë e publikut.
Kushti i dytë-pamundësia e urdhërit të prokurorit
Policia Gjyqësore kryen “ndalim me iniciativë” në pamundësi për të pritur urdhërin e prokurorit. Në rastin konkret, a është e vërtetë që Policia nuk mund të komunikonte dhe të priste urdhërin e prokurorit?
Kjo tingëllon e pavërtetë, pasi;
Së pari, shoqërimi i deputetin ndodhi në mbrëmje, në mes të Tiranës, ku jo vetëm kushtet gjeografike, por edhe teknologjia është aq funksionale, sa që komunikimi, jo vetëm telefonik, por edhe fizik, është lehtësisht i realizueshëm.
Së dyti, Prokuroria e Tiranës, si edhe çdo prokurori tjetër, funksionon me grafik gatishmërie. Kjo do të thotë që një apo disa prokurorë qëndrojnë ‘dezhurn” për të trajtuar ngjarjet që ndodhin pas orarit zyrtare të punës.
Pra, duket e pamundur që Policia të mos ketë pasur mundësi objektive për të komunikuar me prokurorin/prokurorët e gatshëm para se të vendosnin “ndalimin me iniciativë”.
Duket qartë, pikërisht nga dokumentat që hartojnë punonjësit e policisë, se ndalimi i Bardh Spahisë nuk ka lidhje me ligjin, por me “shoë-n” policor ndaj eksponentëve të opozitës.
