Nënkryetari i PD-së, Edi Paloka, tha se arrestimet, ndalimet, shoqërimet e paligjshme të popullit, nuk bëjnë asgjë tjetër veçse japin kushtrimin për mbrojtjen e ligjit, Kushtetutës dhe rendit demokratik.
Paloka tha se duke përdorur mjetet represive kundër popullit, Edi Rama po mbron karrigen në bashkëpunim me bandat dhe krimin e organizuara.
“Policia po përdoret si bandë kundër popullit nga Edi Rama dhe Sandër Lleshaj.
Krim kryen kushdo që refuzon zbatimin e ligjit, në rastin konkret Rama, Lleshaj dhe çdo polic që dhunon qytetarët që po mbrojnë ligjin.
Edi Rama është i vetmi rrezik për vendin, i cili ka planifikuar përplasje dhe konflikt civil në Shqipëri.
Edi Rama është i zhytur në krime elektorale, është pengesa e vetme që Shqipëria nuk po kthehet në normalitet dhe nuk mund të ofrojë asnjë zgjidhje”, tha Paloka.
Deklarata e plotë
Për pushtetin personal dhe për pasurinë e tij të paligjshme, Edi Rama po tregon se është i gatshëm t’i vërë zjarrin Shqipërisë, të nxisë konfliktin civil dhe vëllavrasjen mes shqiptarëve.
Edi Rama dhe banda e tij, në paligjshmëri të plotë, po arrestojnë qytetarët për arsyen e vetme se ata po zbatojnë ligjin. Ky ligj është botuar në fletoren zyrtare nga vetë qeveria dhe është akti i vetëm në fuqi për zgjedhjet.
Duke përdorur mjetet represive të goditjes së qytetarëve dhe kundërshtarëve politikë, Edi Rama po mbron karrigen e blerë në bashkëpunim me krimin e organizuar dhe bandat në të gjithë Shqipërinë.
Kjo është arsyeja përse Edi Rama dhe Sandër Lleshaj po e përdorin sot policinë si bandë kundër popullit, në shkelje të Kushtetutës, në shkelje të ligjit dhe të dekretit të Presidentit që ka shfuqizuar 30 Qershorin.
Krim, kryen kushdo që refuzon apo ndalon zbatimin e ligjit, në rastin konkret, Edi Rama, Sandër Lleshaj dhe policët që sillen si banditë me uniformë.
Kjo i bën ata zyrtarisht dhe ligjërisht një bandë të armatosur, pa ligj e pa ligjshmëri.
Qytetarët duhet ta dinë se çdo akt dhe thirrje për 30 Qershorin e Edi Ramës dhe i Sandër Lleshaj është antikushtetues dhe i paligjshëm.
Edi Rama është i vetmi I interesuar për dhunë dhe përplasje icivle, sepse tani ai ka dalë zbuluar përpara qyetarëve dhe gjithë botës. Por plani i tij për përplasje dhe konfilkt civil në Shqipëri, do të dështojë.
Dhuna dhe kërcënimët e paligjshme ndaj popullit nuk bëjnë asgjë tjetër veçse japin alarmin e menjëhershëm që çdo qytetar të jetë në këmbë për mbrojtjen e demokracisë, rendit kushtetues, lirive dhe të drejtave të tyre.
Me këtë kushtrim dhe të vendosur për kauzën tonë, ne do të jemi të gjithë bashkë të premten në orën 20.00, në protestën kombëtare dhe qytetare për Shqipërinë si gjithë Europa.
