Një efektiv i policisë Bashkiake humbi ndjenjat në Kukës, pasi policia hodhi gaz në ambientet jashtë KZAZ-së. Raportohet se ka humbur ndjenjat Selman Sota, i cili është transportuar për në spital.
Sot është tensionuar më shumë situata në KZAZ e bashkive të cilat kanë vendosur të zbatojnë dekretin e presidentit Ilir Meta i cili rrëzoi 30 qershorin si datë e zgjedhjeve lokale. Tensione janë vënë re dhe në në Kukës. Qytetarët dhe punonjës së bashkisë tentuan të hapin me forcë derën kryesore të godinës ku ndodhet KZAZ. Por, policia i sprapsi me gaz. Për pasojë, efektivi i policisë bashkiake humbi ndjenjat.
Më herët, edhe në Kamzë, një efektiv i policisë bashkiake humbi ndjenjat.
Tensione janë shënuar dje dhe kanë ardhur në rritje ditën e sotme në disa nga KZAZ e vendit. Nga bashkitë e opozitës është kërkuar lirimi i institucioneve që përdoren në kuadër të zgjedhjeve lokale të 30 qershorin, me argumentin se kjo datë është rrëzuar me dekretin e Presidentit Ilir Meta. Ndërkohë, KQZ, që ka mbështetjen e policisë, e quan anti-kushtetues vendimin e Metës. Forca policore janë vendosur në KZAZ dhe janë përplasur me qytetarët dhe punonjës së bashkive që kërkojnë lirimin e këtyre institucioneve nga materialet zgjedhore në zbatim të dekretit të Presidentit.
