Bilbil Elezaj, i arrestuar pasi ndaj tij rëndonte një urdhër-kërkimi ndërkombëtar, është vënë në pranga pas një takimi të fshehtë me bashkëshorten.
“Ky shtetas ishte shpallur në kërkim nga ZQK Interpol Tirana, pasi Autoritetet Gjyqësore në Bolonjë/ Itali me vendimin nr. SIEP 815/2018 dt.25.10.2018 e kanë dënuar me 5 vjet burg për veprën penale ‘Kanosja me anë të shtrëngimit për dhënie pasurie’ parashikuar nga neni 110 i Kodit Penal Italian. Veprimet e mëtejshme do të kryhen nga ZQK Interpol Tiranë, me qëllim ekstradimin e këtij shtetasi drejt Italisë”, bëri me dije një ditë më parë policia e Tiranës, në njoftimin për ndalimin e 52-vjeçarit.
Hetimet – Këtë të martë, mediat italiane zbardhin prapaskenat e arrestimit të 52-vjeccarit. Raportohet se Elezi ishte krahu i djathtë i Antonio Gualtieri-t, sipas hetuesve italianë kreu një organizatë kriminale të lidhur me ndrangheta-n. Ai kishte ikur nga Italia dy ditë para vendimit të Gjykatës së Lartë më 24 tetorit të vitit të kaluar, që konfirmoi dënimin e tij dhënë në shkallë të dytë (Gjykata e Lartë konfirmoi dënimin me 5 vite burgim për 52-vjeçarin dhënë nga Apeli i Bolonjas).
Më konkretisht, Elezaj ishte i ngarkuari i organizatës kriminale për të mbledhur personalisht të ardhurat e gjobave ndaj disa sipërmarrësve në Emilia, Lombardia dhe Veneto. Emri i shqiptarit u fut në listën e “Red Notice” të Interpolit.
Arrestimi – Raportohet se ai ishte vendosur në qytetin e lindjes, Kukës, pas arratisë. Gjatë ditëve të fundit, karabinierët e Piaçencës, të cilët po monitoronin bashkëshorten e Elezajt në Itali, u raportuan kolegëve të policisë shqiptare lëvizjen e pazakontë të gruas nga Italia në Shqipëri. Dy vende strehimi janë identifikuar në Tiranë, ku çifti është takuar. Dje në mëngjes, pas takimit të të dyve, policët shqiptarë që i ndoqën dhe i kontrolluan pranë aeroportit, ndërsa gruaja e tij po hynte për t’u kthyer në Itali. I arratisuri u bllokua menjëherë.
/Boldnews.al/
