Pasi kreu stërvitjen e parë në tokën sllovene me Partizanin, trajneri i ri i të kuqve, Franko Lerda, foli për kanalin e klubit në rrjetet sociale, ku u shpreh i kënaqur nga karakteristikat e grupit që ka në dispozicion, ndërsa komentoi dhe shortin e hedhur sot për turin e parë të Champions League.
GRUPI – Sot ishte dita ime e parë ku takova djemtë në fushë. Ishte një takim pozitiv. I pashë, dhe punuam mirë, me intensitetin dhe kualitetin e duhur. Jam i kënaqur dhe kjo më jep besim, sepse pashë një skuadër që ka dëshirë të përmirësohet dhe të rritet. Pashë një grup që ka karakteristikat e duhura, dhe na jep shpresat se do të bëjmë mirë.
SHORTI – Për shortin nuk kisha ndonjë ekip të preferuar, sepse sa herë hidhen, ka diskutime të ndryshme. Në fund, duhet të mendojmë për veten tonë, dhe të shkojmë në ndeshje me përgatitjen e duhur fizike e atletike, teknike dhe taktike, por mbi të gjitha, psikologjikisht të bindur që të kalojmë turin, sepse ndeshje të lehta nuk ka. Kemi besim se do të shkojë mirë.
MIQËSORET – Për momentin kemi dy miqësore. Një në datë 23, dhe një tjetër në datë 26 qershor. Më pas, kemi menduar së bashku me stafin, të shikojmë kur të bëjmë miqësoren e tretë, sepse duhet të mënaxhojmë fuqitë. Tani, kemi 2 miqësore ndaj dy skuadrave të rëndësishme.
