Partia Demokratike deklaron se zyrtarët e dalë në përgjimet e BILD për votimet duhet të ishin në burg. Në një deklaratë për mediat nga selia blu, Gazmend Bardhi deklaroi se përgjimet tregojnë se Edi Rama, qeveria e tij dhe PS kanë vepruar si një grup i strukturuar kriminal për të marrë dhe mbajtur pushtetin në mënyrë të paligjshme.
“Edi Rama, Damian Gjiknuri, Pjerin Ndreu, Vangjush Dako e me radhë duhet të ishin sot në burg për vjedhjen e votave”, tha Sekretari i Përgjithshëm i PD-së, “për shqiptarët tani është e qartë se nuk mund të ketë zgjedhje me Edi Ramën kryeministër dhe pa nxjerrë para drejtësisë ata që vodhën votat”.
Më tej, Enkeljed Alibeaj, jurist dhe ish-ministri i drejtësisë, ka zbuluar veprat penale që kanë konsumuar zyrtarët që dalin në përgjimet e BILD.
Për kryeministrin Edi Rama, Alibeaj, tha se ka konsumuar nenin 328/a të Kodit penal, që parashikon dënim nga 1 deri në 3 vite burg. Duke iu referuar telefonatës së Ramës me Arben Keshin, Alibeaj tha se edhe Keshi ka konsumuar të njëjtën vepër penale.
Në telefonatën me një mësues ku flisnin për shit-blerje votash, Alibeaj shpjegoi se Keshi ka konsumuar nenin 328 të Kodit penal e që parashikon dënimin nga 1 deri në 5 vite burgim.
Për telefonatën e shefit të policisë së Kazmës Sali Skurra me Arben Keshin, drejtor në Ministrinë e Brendshme, se është konsumuar nga të dy neni 328 A i Kodit Penal.
Të njëjtën vepër penale të parashikuar nga neni 328/a i Kodit penal ka konsumuar dhe Gjiknuri e Keshi, tha Çlirim Gjata, Sekretari për Çështjet ligjore në PD, duke iu referuar telefonatës mes të dyve.
Gjata shpjegoi më tej veprat penale që janë konsumuar, duke iu referuar bisedës së tij me drejtorin Rajonal të Arsimit në Dibër dhe më tej telefonatës së këtij të fundit me drejtorin e një shkolle.
Në skaner u kaluan edhe të tjera biseda dhe u shpjeguan nga ana ligjore vepra penale që është konsumuar.
