Kryeministri Edi Rama prej disa javësh kërcënon shqiptarët se nuk do të lejohen të ikin në SHBA, por edhe në vendet e BE-së, nëse do të ndërmarrin veprime që i prishin zgjedhjet e 30 qershorit, të anulluara me dekret të Presidentit Ilir Meta.
Në takimet që zhvillon ku prezanton kandidatë të Rilindjes, Rama madje ka shtuar dozat kur thotë se jo vetëm ata që prishin zgjedhjet, por edhe familjarë të tyre nuk do të lejohen të shkojnë në SHBA dhe vendet e BE-së, duke u trajtuar si kriminelët.
“Përveç dënimet nga 1 deri në 5 vjet që parashikon ligji pë rata që prishin zgjedhjet, kur të mbarojnë punë me drejtësinë shqiptare, nuk do të mund të dalin nga Shqipëria”, ka deklaruar Rama, i cili po shkon i vetëm drejt 30 qershorit.
Në anën tjetër Bild ka publikuar plot 22 përgjime lidhur me manipulimin e zgjedhjeve. Përgjime zyrtare, të kryera nga prokuroria, e cila prej dy apo 3 vjetësh mban në sirtare CD apo dokumente të zbardhura të atyre që njihen si dosjet 339 dhe 184.
Më konkretisht, dy dosjet zbardhin skemënn e manipulimit të votave, përmes blerjes, kërcënimit dhe çdo forme tjetër të votave në qarqet Durrës dhe Dibër.
Nga përgjimet rezulton se në skemën e manipulimit janë përfshirë kupola drejtuese e Rilindjes, nga kryeministri, ministra, ish-ministra, deputetë dhe ish-deputetë, drejtorë lokalë dhe qendrore, të gjithë të angazhuar për të blerë dhe për të gjetur njerëz që shesin.
Përgjimet tregojnë, tashmë me zë, se votat mund të blihen me 20, 30, 40 apo 50 mijë, dhe madje votat janë kthyer si mall në tregun e gjësë së gjallë, ku me to mund të bësh edhe ceremoni fejesash apo dasmash. Por me votën mund të mbetesh edhe pa bukë, nëse nuk e hedh atje ku të thotë Rilindja.
Dhe pas këtyre përgjimeve, dhe deklarimeve të bëra nga kryeministri, lind pyetja po Rama, Dako, Gjiknuri, Ndreu, Keshi dhe çdo drejtor tjetër i përfshirë në manipulim zgjedhjesh, a lejohen të shkojnë në SHBA dhe vendet e BE?
Ndoshta Rama kur e deklaron mendon se loja nis nga 30 qershori e në vijim.
Por secili prej atyre që janë kapur në përgjime mund të jetë pjesë e listës së zezë qoftë kjo nga SHBA, ashtu edhe nga BE. /BN/
