Teksa në Korçë janë në pritje të një ven dimi nga Gjykata e KAS-it në Lozanë, ambienti dhe korridoret sportive në vend janë të mbushura me doza optimizmi. Sigurisht që kjo nuk buron vetëm nga dëshira për të fshirë nga lista e të dënuarve ekipin shqiptar, por me disa elemente që derivojnë nga i gjithë procesi i deritanishëm.
Gazeta ju sjell edhe elementet e mundshëm që mund të shërbejnë në fund për të marrë një përgjigje dhe vendim pozitiv nga KAS.
OPTIMIZMI
I pari që është optimist me doza të larta, madje që e fsheh diçka të tillë me shumë mjeshtëri, është Ardian Takaj. Kjo ndoshta për vetë faktin se studio që e ka marrë përsipër mbrojtjen, me anë të avokatëve të saj, e ka mbushur me optimizëm dhe me doza besimi se mund t’ia dalin.
Pavarësisht se pak kohë më parë, vetë Takaj e detyroi klubin që të mohonte zyrtarisht sinjalet pozitive, kohë kur “Panorama Sport” trajtoi me kujdes çështjen se Skënderbeu mund ta fitojë gjyqin dhe të ketë dëmshpërblim, fakt është se tani kreu i klubit korçar është me shpresa të mëdha për t’ia dalë mbanë në këtë çështje.
ELEMENTET
Në të gjithë këtë proces, Skënderbeu është dënuar në një rrugë të pashkelur deri më tani nga asnjë gjykatë dhe të paprovuar as nga UEFA dhe as nga ndonjë klub tjetër. Nenet mbi të cilat studioja ligjore e kontraktuar nga korçarët po punon dhe e ka bazuar mbrojtjen, duket se “po pinë ujë”. Pra, janë elemente të rëndësishëm, mbi të cilat teza mbrojtëse po funksionon juridikisht në KAS.
SË PARI
Skënderbeu është i dënuar nga UEFA, por si klub, si logo dhe nuk ka asnjë individ të akuzuar. Sipas kësaj teze, logjika është e thjeshtë: Kush është fajtori? Kush e ka kryer krimin e trukimit të ndeshjeve? Presidenti? Kapiteni? Portieri? Një sulmues? Një zyrtar tjetër klubi? Kush, pra? Asnjë nga këto pyetje nuk ka një përgjigje në vendimin ku Skënderbeu është dënuar.
Pra, dakord që është dënuar klubi i Skënderbeut, po realisht cilët individë e kanë bërë shkeljen? Pasi dënimi kolektiv, por pa asnjë fajtor, zor se “pi ujë” në gjykatat ndërkombëtare… Në këtë mënyrë, vendimi i bazuar vetëm në luhatje koeficientësh dhe përllogaritje kompjuterike duket se ka lënë hapësira mbrojtëse për studion që ka marrë në patronazh korçarët…