Edi Rama duhet të japë dorëheqjen. Kërkesa vjen nga partia Zgjidhja e drejtuar nga Kocco Kokëdhima, pas publikimit të përgjimeve të reja nga Bild.
“Është një pazar i ndyrë, një skemë mafioze, në shërbim të të cilës vihet i gjithë shtetit, të gjithë zyrtarët, që intimidojnë dhe kërcënojnë me bukën e gojës punonjësit buxhetorë dhe familjarët e tyre që të votojnë partinë-shtet, ndryshe dalin në rrugë, pa punë”, thuhet në deklaratën e Zgjidhjes, që drejtohet nga një prej njerëzve më të besuar të Edi Ramës, deri në momentin e përplasjes mes tyre.
Deklarata
Orteku i përgjimeve të dosjes 184 për zgjedhjet në Dibër po tregon vetëm një pjesë të masakrës elektorale që ndodh në Shqipëri sa herë ka votime, administrative apo të përgjithshme. Përgjimet e gazetës gjermane ‘Bild’, nuk po zhgënjejnë askënd: është bërë pazar për çdo votë, me çdo kusht dhe me çdo çmim. Por dhe nuk po habisin askënd. Në krye të kartelit të vjedhjes së votave është kryeministri Edi Rama, ministrat dhe deputetët e tij që koordinojnë me zyrtarë të Ministrisë së Brendshme, drejtues vendorë dhe biznesmenë, me qëllim rrëmbimin e çdo vote në Dibër. Është ish-ministri i Transporteve, Damian Gjiknuri, zyrtari i akuzuar për sa e sa afera me punët publike, PPP-të, HEC-et apo Unazën e Re, të cilin Rama e ka vënë në krye të Komisionit të Posaçëm për Reformën Zgjedhore.
Është ish-deputeti Pjerin Ndreu, njëri prej 61 kandidatëve që Rama ua çon shqiptarëve për zgjedhjet pa rivalë që kërkon të mbajë me çdo çmim dhe me çdo kosto më 30 qershor 2019. Përgjimet bëjnë autopsinë se si partitë e vjetra veprojnë si banda për të siguruar votat, duke vënë në përdorim gjithë makinerinë shtetërore.
Është një pazar i ndyrë, një skemë mafioze, në shërbim të të cilës vihet i gjithë shtetit, të gjithë zyrtarët, që intimidojnë dhe kërcënojnë me bukën e gojës punonjësit buxhetorë dhe familjarët e tyre që të votojnë partinë-shtet, ndryshe dalin në rrugë, pa punë.
‘Zgjidhja’ e ka denoncuar që në vitin 2016 kartelin e drogës që kishte krye Edi Ramën, një skemë shtetërore e lidhur me krimin e organizuar për të nxjerrë miliardat e pista. Me paratë e kanabisit u blenë më pas edhe votat. Përgjegjës kryesor për këtë është vetëm njëri: Edi Rama. Ky mafioz, shef i kartelit të drogës dhe të vjedhjes së votave, që duhet larguar menjëherë nga detyra. Ky njeri i papërgjegjshëm që për egon e tij të pakufishme për pushtet vjedh votat ku dhe si të mundë dhe më pas bastis Shqipërinë.
Ky njeri sot duhet të japë dorëheqjen. Kjo është më e pakta. Ai ka disa javë që vërdalliset me qindra policë nëpër Shqipëri, duke trumbetuar 30 qershorin dhe duke kërcënuar me burg gjithësecilin që prek votën. Ka shansin që ta nisë nga vetja, nga Gjiknuri, Ndreu, Keshi dhe të gjithë ‘Keshët’ e administratës që duan të blejnë sërish votat me para të pasta ‘kesh’, si 2 apo 3 vite më parë.
‘Zgjidhja’ u bën edhe një herë ftesë publike socialistëve të ndershëm që të distancohen nga sekti i Rilindjes. Ata duhet ta izolojnë Ramën në aventurën e çmendur për t’i vjedhur sërish zgjedhjet dhe më pas Shqipërinë, e për ta çuar vendin në konflikt social.
Shqipëria duhet pastruar nga kjo farë e keqe që ka 25 vite që vjedh vota, duhet çliruar nga kjo kastë mafioze që i ka vjedhur pushtetin popullit, ia blen votën për një thes miell dhe një honorar të qelbur dhe ia merr me dhunë, kur ai reziston. Duhet të triumfojë vota e lirë, ajo që do të çlirojë edhe Shqipërinë nga mafia e partive të vjetra.
