Naser Al Khelaifi është lodhur nga deklaratat e futbollistëve që duan të largohen nga PSG-ja dhe përçarjet që kanë ndodhur në ekip gjatë këtij sezoni. Presidenti i skuadrës ngre zërin dhe thotë se kush nuk dëshiron të punojë në Paris i ka dyert e hapura për t’u larguar. Nuk ka emra në këtë kërcënim, por ata që duhet ta lexojnë mirë këtë deklaratë janë Kilië Mbape dhe Nejmar.
I pari bëri një deklaratë befasuese disa javë më parë ku kërkoi më shumë përgjegjësi, ndërsa i dyti kërkon të rikthehet te Barcelona. “Futbollistët e PSG-së duhet të marrin përgjegjësi më shumë se kurrë për të ardhmen. Duhet të kemi një atmosferë tjetër në skuadër.
Duhet të bëjnë më shumë, të punojnë më shumë, në mënyrë që të arrijmë objektivat. Nëse nuk janë dakord me këtë gjë, atëherë dyert janë të hapura. Mirupafshim. Nuk dua më sjellje të tilla në skuadrën time. Nuk dua më ndarje të tilla në skuadër”, ka thënë fillimisht Al Khelaifi.
Leonardo- Ai foli gjithashtu edhe për rikthimin e Leonardos si drejtor sportiv te PSG-ja për t’i zënë vendin Antero Henrikes. “Në dy minuta arritëm akordin me njëritjetrin. Leonardo ka pushtet të plotë dhe do të bëjë gjithçka në aspektin sportiv. Ai është drejtor i jashtëzakonshëm dhe kam besim të verbër. Autoriteti i tij është i mirë për të gjithë lojtarët”, tha presidenti i PSGsë për “France Football”.
Mbape- Kalimi i Leonardos nga Milani te PSG-ja duket se është një goditje për sulmuesin francez Kilië Mbape. Tani ai do të mbetet “vetëm” dhe pa përkrahje, pasi Henrike ishte një njeri që i qëndronte pranë. Duke qenë se Leonardo është brazilian, mediat shkruajnë se ai do të përkrahë Nejmarin dhe kjo gjë do të sjellë probleme. Megjithatë, Leonardo u rikthye te PSG-ja për të vendosur rregull dhe jo për t’u marrë me çështje të tilla. Objektivi i skuadrës franceze është Liga e Kampionëve.
