Krijohet Aleanca Qytetare për Mbrojtjen e Demokracisë në Mat e Klos. Pas udhëzimit të Këshillit Kombëtar të PD-së, degët e partisë më të madhe opozitare, kanë nisur ngritjen e strukturës, referuar territorit të bashkive.
“Ne sot i kërkojmë mirëkuptim dhe bashkim çdo qytetari të ndershëm matjan, përtej bindjeve dhe ndasive politike apo partiake në një mision për të shpëtuar demokracinë, në një mision për të ndaluar rikthimin e monizmit, për të shpëtuar pluralizmin dhe për të çliruar vendin nga pushteti i mafies dhe krimit të organizuar’, thuhet në një deklaratë të Aleancës Qytetare për Mbrojtjen e Demokracisë.
DEKLARATË
Me shqetësim dhe përgjegjësi të lartë qytetare, sot ne përfaqësues të subjekteve politike, përfaqësues shoqatash, sindikatash dhe grupeve të ndryshme të interesit, vendosëm ngritjen e Aleancës Qytetare për Mbrojtje të Demokracisë në Bashkitë Mat dhe Klos.
Aleanca Qytetare për Mbrojtjen e Demokracisë, konstaton se ka një degradim të rëndë të standardeve demokratike në Shqipëri.
Shkaktarë të drejtpërdrejtë dhe të vetëm të këtij degradimi janë pangopësia e një grushti oligarkësh dhe individësh të inkriminuar, të drejtuar nga kryeministri i vendit Edi Rama.
Aleanca Qytetare për Mbrojtjen e Demokracisë konstaton se, liritë e të drejtat e njeriut, garancitë kushtetuese dhe gjithçka është arritur pas viteve 90 po vihet dita ditës në rrezik nga një sekt që ka uzurpuar shtetin e pushtetin dhe po varfëron e çpopullon vendin.
Aleanca Qytetare për Mbrojtjen e Demokracisë konstaton se, për shkak te pangopësisë për pasuritë kombëtare dhe për pushtet, kryeministri i vendit me anë të një puçi institucional, ka asgjësuar gjykatat e vendit, refuzon autoritetin kushtetues të Presidentit të Republikës dhe është vetëm një hap larg asgjësimit të pluralizmit në Shqipëri.
Të vendosur për të mbrojtur arritjet e vendit në këto 29 vjet, të drejtat e liritë kushtetuese, pluralizmin dhe për të mbrojtur orientimin Euroatlantik të vendit, ne sot i drejtohemi qytetarëve të Matit, pa dallim bindjesh e përkatësish politike, ti bashkohen Aleancës Qytetare për Mbrojtjen e Demokracisë për të mbrojtur rendin e të drejtat kushtetuese.
Ne sot i kërkojmë mirëkuptim dhe bashkim çdo qytetari të ndershëm matjan, përtej bindjeve dhe ndasive politike apo partiake në një mision për të shpëtuar demokracinë, në një mision për të ndaluar rikthimin e monizmit, për të shpëtuar pluralizmin dhe për të çliruar vendin nga pushteti i mafies dhe krimit të organizuar.
Të bashkohemi e ngrihemi si në ‘90, për një Shqipëri demokratike për një Shqipëri si Evropa.
Burrel, më 15.06.2019