Përzgjedhja e mësuesve / Avokatja numëron mangësitë, sistemi problematik dhe…

Avokatja civiliste, Denisa Daka i ka kushtuar një shkrim kritik sistemit të arsimit në vend, kryesisht mënyrës sesi bëhet përzgjedhja e mësuesve. Sipas avokates Daka, sistemi është shumë problematik dhe për fat të keq ky sistem do vazhdojë të mbetet në këtë gjendje, për aq kohë sa politika e përdor atë për interesa të saj.

Postimi i plotë

Një udhëzim dalë së fundmi nga Ministria Arsimit, sqaron se në muajin korrik mësuesit aplikantë për punë, do të përfshihen në sistemin arsimor me një rend të posaçëm pikësh e pas kësaj vlerësimi i tyre do të bëhet përmes dosjeve të tyre profesionale në njê testim digjital.
Një proces delikat, i cili ka impakt të drejtpërdrejtë mbi çdo fëmijë këtu, ndërsa përzgjedhja e çdo mësuesi vijon të bëhet ende përmes një rendi pikësh a numrash.
Ky sistem arsimor me probleme të shumta, nuk mund të vijojë të iniciohet ende në këtë format, pasi kjo mënyrë pērzgjedhjeje, nuk konsiston në përmirësimin e cilësisë së sistemit arsimor, metodave e procesit të mësimdhënies posaçërisht, përkundrazi.
Këta mësues nuk janë makineri prodhimi që ne t’u njohim markën a shasinë, këta mësues duhen trajtuar me respekt duke i dhënë rastin secilit prej tyre të mund të na tregojnë të gjithëve së bashku se e duan këtë profesion e duhet të jenë pjesë e këtij sistemi, për shkak të cilësive të veçanta e performancës së tyre, njerëzore e profesionale njëkohësisht.
Secili prej nesh përgjatë rrugëtimit si prind, është ndeshur me mësues të devotshëm e vullnetmirë, me të tjerë problematikë e të paaftë jo në pak raste.
Viktima të një sistemi që prodhon të tilla formate shterpë e shabllon, ne jemi sot pa shpresë e besim tek institucionet arsimore, tek ç’ka këto të fundit ofrojnë për fëmijët tanë, përmes prurjeve jashtë kritereve jo në pak raste.
Klishetë larg standardit bashkëkohor, nuk po zëvendësohen ende me forma efikase të cilat të mund të orientojnë e përfshijnë në këtë sistem, mësues që kanë dëshirë të punojnë me apo për fëmijët.
Përpos kësaj ka ardhur koha që në këto komisione pranimi a vlerësimi, si në disa vende të përparuara, të jenë të përfshirë dhe nxënës e prindër, si subjekte që tërheqin të drejta e detyrime në këtë rast.
Një akt vlerësimi i posaçëm, nga kolegët nxënësit e prindërit, lidhur me qasjen e profesionalizmin e aksh mësuesi, duhet të jetë pjesë e kësaj dosje profesionale doemos.
Aftësitë e posaçme të sejcilit prej tyre për të bashkëpunuar e ndërvepruar me nxënësit, duhet të jenë deviza e këtij proçesi, ndërsa kryerja e një testi psikologjik për secilin prej tyre nga specialistë të fushës para se të hynë në këtë garë, është nevojë e kahershme për të qënë pjesë e këtij investigimi.
Në rast të kundërt ne rrezikojmë të kemi ende një sistem problematik e të pakonsoliduar, apo mësues jashtë formatit që ne presim të gjithë, fëmijët tanë posaçërisht.
Ky sistem arsimor ka nevojë doemos për mësues që e duan mësimdhënien, duke qënë të gatshëm të përcjellin tek nxënësit e tyre, përveç dijes dhe besim, dëshirë e pasion për tê nxënit posaçërisht, duke rritur tek sejcili prej tyre vetbesimin e respektin për veten e duke nxitur e zhvilluar tek këta të fundit, të menduarit kritik dhe hulumtues.
Ndryshe do të refuzojmë të jemi pjese e këtij sistemi arsimor, duke kërkuar dritë e shpresë për fëmijët tanë, jashtë Shqipërisë.

LEXO EDHE  Zyrtari i lartë amerikan shmang vizitën në Tiranë/ Reeker udhëton drejt Athinës dhe Shkupit