“Presidenti i takon Republikës dhe Republika qytetarëve. Dekreti është i detyrueshëm për të gjithë, kush ecën në rrugën paligjshmërisë do ketë pasoja të rënda”. Ishte ky paralajmërimi që bëri Presidenti Ilir Meta.
Kreu i shtetit iu përgjigj pyetjeve të gazetarëve pas një aktiviteti në Tiranë. Meta tha se Shqipërisë i duhen zgjedhje të lira e të ndershme, ç’ka sipas tij, i hap rrugë negociatave me BE-në. Duke iu përgjigjur interesimit të mediave se kur do ta thërrasë Ramës në vazhdën e konsultimeve me aktorët politikë për datën e re të zgjedhjeve, Meta u përgjigj se do të ndodhë së shpejti.
Pyetjes a keni reflektuar pas 100 votave kundër jush për rezolutën e PS-së që votoi dje parlamenti, Meta tha:
“Shqipëria është Republikë, presidenti i takon Republikës, dhe republika iu takon vetëm qytetarëve. Po punoj me qetësi dhe përgjegjësi. Dekreti është në fuqi, presidenti mban shënim çdo institucion që shkel ligjin. Dekreti mund të gjykohet dhe nga gjykata e Skraparit. Presidenti nuk ndalon askënd të çmendet. Por presidenti bën thirrje të ndalojmë çdo të çmendur. Shqipëria ka nevojë për zgjedhje të lira e të ndershme. Dekreti është në fuqi, i zbatueshëm dhe i detyrueshëm për të gjithë. Presidenti ka të drejtë çdo ditë të bëjë thirrje për reflektim. Do kenë pasoja të gjithë ata që do provokojnë paqen sociale”, tha ai.
Më herët gjatë ditës sotme, Rama foli edhe për dekretin e Metës që rrëzoi 30 qershorin si datën e zgjedhjeve lokale.
“Është befasi në historinë re republikave në botë. Firmën se merr era si fjalët, po e hodhe si kthehesh prapë. Ku është pa kjo?! Gaboi shumë gaboi. Gaboi po është pjesë e planit nuk është lajthitje. Kur bëmë marrëveshje me Bashën, zyra e nishanit merrte në telefon ‘bini letrën e konsensusit për të shtyrë datën një javë’, që atëhere ishte.. marrëveshja u bë në mes të natës, ishte gjë e madhe. Kemi çu letër, e kemi firmos, e kemi çu në Presidencë dhe pastaj doli dekreti. Si erdhi puna, doli Bujar Nishani burrë shteti! Te dekreti i Xhafës bëri gjithë atë fjalim kundër po e firmosi dekretin. Nga pikëpamja institucionale nuk ka lëviz”, tha Rama. /BN/
