Jorgo Pëllumbi duket se është një nga xhevahirët e Skënderbeut. Zbulimi i vitit në kampin korçar ka tërhequr shumë interesin e skautëve të ndryshëm për sa i përket së ardhmes.
Pas një sezoni të suksesshëm në radhët e Skënderbeut me ndeshje të zhvilluara në një nivel maksimal, korçari është futur në mes të “vorbullës” së merkatos, aq sa interesimi i ekipeve të huaja për të është befasues. Burime bëjnë me dije për gazetën se janë plot katër ekipe të niveleve të larta që janë vënë në ndjekje të Pëllumbit.
Madje, po të njëjtat burime bëjnë me dije se në ndeshjen e fundit sezonale të luajtur në Korçë përballë Luftëtarit menaxherë italianë kanë parë nga afër paraqitjen e futbollistit korçar. Interesimi i tyre ka qenë i madh, madje kanë takuar edhe përfaqësuesit e Pëllumbit për të diskutuar rreth një transferimi të mundshëm. “Panorama Sport” mëson ekskluzivisht se bëhet fjalë për ekipe me emër në Europë.
Lacio, Gent, Salzburg dhe Hajduk Split janë katër klubet e interesuara për futbollistin në fjalë. Nëse oferta e tyre zyrtarisht ende nuk ka mbërritur në zyrat e klubit bardhekuq është fakt se interesi i tyre është real, madje kanë marrë informacionin e duhur nga klubi. Në të tilla kushte, duket se është e pashmangshme që Shkumbin Qormemeti, njeriu i besuar i Takajt për merkaton, të marrë menaxhimin e lojtarit. Gjë që nuk kundërshtohet edhe nga vetë futbollisti duke parë arritjet e Qormemetit në merkaton bardhekuqe.
SITUATA
Duke parë interesimin e madh për mbrojtësin e ri, korçarët janë të interesuar që ta mbajnë edhe një vit Pëllumbin në ekip. Sidomos nëse korçarët fitojnë të drejtën e pjesëmarrjes në Europë. Në të tilla kushte, vlera e kartonit të futbollistit do të rritej akoma më shumë. Ky në vetvete është qëllimi i Skënderbeut në këtë pjesë, pasi kërkon që të përfitojë sa më shumë që të jetë e mundur nga transferimi i lojtarit në një kampionat më të rëndësishëm se ai shqiptar.
Jo rastësisht edhe Kombëtarja e Shpresave i ka bërë ftesë për ta pasur në gjirin e saj. Madje, Pëllumbi ka luajtur nga minuta e parë në ndeshjen e fundit të kombëtares së drejtuar nga Bushi ndaj Uellsit, duke treguar cilësi dhe saktësi. Edhe kjo shkon në krahun e Skënderbeut që fiton akoma edhe më shumë, pasi i shton vlerën e kartonit futbollistit. Pa dyshim që në situatën e krijuar, Pëllumbi duket se është xhevahiri i Skënderbeut i zbuluar këtë sezon nga Orges Shehi.
/Panorama Sport/
DENONCO