Kuvendi miratoi me 100 vota pro rezolutën e propozuar nga Partia Socialiste kundër dekretit të Presidentit Ilir Meta që anulonte zgjedhjet vendore të 30 qershorit.
Kundër rezolutës votuan deputetët Lefter Maliqi, Eugen Bojaxhi, Enver Roshi, Artur Roshi, Klajd Qama, Elda Hoti, që i përkasin asaj që quhet “opozita e re” dhe socialisti Gjetan Gjetani.
Sikundër mësohet vendimi i deputetëve të opozitës së re, të grupuar në grupe parlamentare, por edhe të pavarur ishte që të abstenohej.
Por duket se një takim i Taulant Ballës, kreut të deputetëve të PS-së, ka bindur shumicën e “opozitarëve të rinj” të drejtuar nga Ralf Gjoni dhe Rudina Hajdari, që të bashkojnë votat me Rilindjen e Ramës.
Vonesa 20 minutëshe e kërkuar nga socialistët për të hedhur në votim rezolutën kishte të bënte pikërisht me pazarin e arritur mes Rilindjes dhe disa prej deputetëve që kanë hyrë në Kuvend me listat shumëemërore të PD dhe LSI, por që sot janë shfaqur si kamardare shpëtimi për Ramën apo shërbëtorë të tij.
Duket se 20 minuta i kanë mjaftuar Taulant Ballës që të bindë grupin e deputetëve që drejtohet nga Ralf Gjoni apo Rudina Hajdari për të bashkuar votat me Rilindjen me një rezolutë që s’ka asnjë vlerë ligjore përsa kohë dekretet e Presidentit mund të interpretohen vetëm nga Gjykata Kushtetuese.
