Ekzekutoi me kallashnikov 24-vjeçarin në Kurbin, kapet autori.
Ngjarja ndodhi mbrëmjen e së mërkurës.
Sipas të dhënave të para të policisë, vrasja ka ndodhur pë shkaqe banale. Mes të rinjve ka pasur një zënkë për një vend parkimi. Debati ka degjeneruar në përdorimin e armëve. Pas ngjarjes autori u largua. Ndërsa mësohet se mbrëmjen e sotme është vënë në pranga.
U shoqërua në ambientet e policisë dhe pritet të merret në pyetje me qëllim zbardhjen e plotë të situatës e cila çoi në humbjen e jetës së një 24 vjeçari.
Njoftimi i policisë
Policia e Kurbinit ka bërë arrestimin e autorit të dyshuar të vrasjes së 24 vjeçarit V.SH, ndodhur mbrëmjen e djeshme.
Si rezultat i punës profesionale të bërë nga grupi i posaçëm hetimor i ngritur nga Policia e Shtetit për zbardhjen e ngjarjes, në bashkëpunim me Prokurorinë e Rrethit Gjyqësor Kurbin u bë e mundur që brenda një kohe të shkurtër të zbardhej ngjarja si dhe të identifikohej autori i dyshuar i vrasjes.
Policia e Shtetit vijoi kontrollet e pandërprera për lokalizimin dhe kapjen e autorit ku falë edhe bashkëpunimit me familjarët e autorit të dyshuar, në këto momente është bërë arrestimi i shtetasit E. K, 32 vjeç, banues Tiranë, si autor i dyshuar i vrasjes së 24 vjeçarit pas një konflikti të çastit.
Materialet iu referuan Prokurorisë pranë Gjykatës së Shkallës së Pare Kurbin për veprime të mëtejshme hetimore, për veprat penale “Vrasje me dashje” dhe “Mbajtja pa leje e armëve dhe municioneve luftarake”, parashikuar nga nenet 76 dhe 278/1 të Kodit Penal.
