Dy persona të maskuar kanë hyrë në një banesë në Laç për të vjedhur dhe në momentin që janë zbuluar kanë ushtruar dhunë ndaj familjarëve.
Një nga anëtarët e familjes ka përfunduar në spital si pasojë e dhunës së ushtruar. Ngjarja e rëndë ka ndodhur mbrëmjen e djeshme, ndërsa policia ka nisur hetimet për identifikimin e grabitësve.
Mësohet se banesa e sulmuar është e shtetasit Hajdar Lika, në lagjen nr.5 Sanxhak, Laç, Kurbin.
Grabitësit kanë goditur me sende të forta në kokë shtetasin Sinan Lika, 29 vjeç, djali i kryefamiljarit.
Ky i fundit pas ndihmës së parë në Spitalin Kurbin, është dërguar për ndihmë të specializuar mjekësore në Spitalin e Traumës Tiranë, ku ndodhet jashtë rrezikut për jetën.
