Deputeti Ralf Gjoni ka mbështetur qëndrimin publik të Myslym Murrizit, i cili foli në emër të dy grupeve parlamentare të opozitës së re, lidhur me shkarkimin e Ilir Metës.
Ish-këshilltari i kreut të shtetit lë të kuptohet se është i gatshëm ta bashkojë votën në parlamente PS-së, që ka nisur procedurat për shkarkimin e Metës, në kërkim të ndryshimit të sistemit zgjedhor.
“Nuk kemi përpara ende asnjë akt parlamentar për shkarkimin e Presidentit. Por kriza aktuale politike po kthehet në një situatë tragji-komike e cila na imponon gjetjen e një zgjidhjeje në Kuvend. Papërgjegjshmëria e kësaj klase të mbaruar politike po dëmton interesat tona kombëtare dhe po shkatërron të ardhmen tonë. Ndaj dhe angazhimi im parlamentar dhe vota ime në Kuvend do të udhëhiqen para së gjithash nga ndryshimi radikal i sistemit zgjedhor, hapja e listave dhe ligji për partitë politike, si strumbullarë të gjithçkaje të mbrapshtë në këtë vend. Ndaj dhe vota ime mbetet e kushtëzuar me ndryshimin e sistemit zgjedhor dhe korrigjimin e masakrës elektorale te vitit 2008″, shkruan ai në një postim në Facebook.
