Presidenti Ilir Meta njoftoi dje se ka rrëzuar 30 qershorin si datën për zhvillimin e zgjedhjeve vendore. Por kryeministri Edi Rama është shprehur i vendosur për zhvillimin e zgjedhjeve në këtë datë, ndërsa opozita e ka cilësuar si fitoren e parë anullimin e datës së zgjedhjeve.
Mazhoranca duket e paqartë në veprimet që do të ndërmarrë ndaj dekretit të ri të Presidentit, i cili pritet që të argumentojë të hënën vendimin për anullimin e datës së zgjedhjeve.
Gjithsesi Edi Rama vijon me agjendën e tij të prezantimeve të kandidatëve.
Kështu ai sot do të jetë në Dibër dhe Burrel, ku pritet t’i qëndrojë fort idesë për zhvillimin e zgjedhjeve.
Në anën tjetër Sekretari i Përgjithshëm i Kryeministrisë Engjëll Agacci, kreu i grupit parlamentar Taulant Balla, por edhe kryeparlamentari Gramoz Rucci, sikundër raportohet, do të angazhohen në takime me jurist zgjedhorë për të përcaktuar strategjinë që do të ndjekë mazhoranca me zhvillimet e reja.
Burime qeveritare shprehen se në takim janë thirrur të gjithë juristët dhe konstitucionalistët pranë PS-së për të dhënë mendimet e tyre, ndërsa propozimet e para nga PS arrijnë deri në shkarkimin e Kreut të Shtetit.
Por mungesa e Gjykatës Kushtetuese duket se mbyll shtigjet për vendimmarrje ekstreme, pasi ccdo vendim i parlamentit duhet të interpretohet nga kjo gjykatë.