Kryeministri Edi Rama ishte paraditen e sotme në Burrel, ku ka mbledhur mbështetës dhe punonjës të administratës për të prezantuar dy kandidatë për kryebashkiakë, atë të Klosit dhe Burrelit.
Në fjalën e tij Rama sulmoi opozitën dhe Presidentin, tha se kanë frikë nga reforma në drejtësi, paralajmëroi shkarkimin e Ilir Metës, tha se kanë frikë nga reforma në drejtësi dhe nga zgjedhjet, por gjithashtu komentoi edhe protestën e djeshme të zhvilluar në Tiranë.
Këtë protestë, Rama e cilësoi si një çimçakiz që zgjatet e zgjatet në boulevard, duke pohuar se qytetarët që nuk duan qeverinë janë shumë më tepër se ata që dalin e protestojnë.
Madje Rama tha se pas çdo proteste ata që dalin në rrugë pakësohen, duke paralajmëruar se ata që bërtasin sot Rama ik, do të ikin vetë më parë.
Por, ajo që i ndodhi Ramës në Burrel, ishte më shumë se një braktisje e qytetarëve. Nëse ai ka bërë një takim për të prezantuar dy kandidatë, atë të Klosit dhe Burrelit, me llogari të thjeshta rezulton se në mitingun elektoral nuk i kanë dalë as punonjësit e administratës dhe familjarët e tyre, megjithëse me lista janë verifikuar një nga një dhe emër për emër.
Takimi i dështoi, tonet për përplasje iu shtuan, po kështu edhe paralajmërimet dhe kërcënimet, por po i shtohet edhe humbja e qetësisë. Siç duket gjërat janë rrokullisur më shpejt sesa Rama e kishte menduar…
