Jo vetëm protesta e opozitës, por edhe dekreti i Presidentit Ilir Meta për rrëzimin e 30 qershorit si datë për zhvillimin e zgjedhjeve, ka tërhequr vëmendjen e mediave ndërkombëtare.
Dekreti i ri i Kreut të Shtetit i ka dhënë një tjetër kthesë situatës politike në vend.
“New York Times”, “Washington Post”, “Abc”, “AP” “France 24” kanë shkruar për anulimin e zgjedhjeve vendore të 30 qershorit.
Ky vendim shkruajnë ato kërkon shmangien e konfliktit politik dhe social në Shqipëri.
“Associated Press” shkruan se vendimin, Presidenti e motivon me nevojën për të zvogëluar tensionet politike në vend.
Presidenti Ilir Meta tha se veproi sepse “rrethanat aktuale nuk sigurojnë kushtet e nevojshme për zgjedhje të vërteta, demokratike, përfaqësuese dhe gjithëpërfshirëse” më 30 qershor.
Në artikull shkruhet se mijëra shqiptarë që mbështesin opozitën politike u mblodhën për një protestë anti-qeveritare të shtunën.
“Pas perëndimit të diellit, gaz lotsjellës dhe flakë u mjegulluan rrugët e Tiranës”, emeton AP.
Përmes një deklarate, para nisjes së protestës së opozitë, Kreu i Shtetit bazuar në Kushtetutë rendit 5 arsyet pse vendosi të ndërmarrë vendimin. Por gjithashtu ai deklaroi se më 10 qershor, Institucioni i Presidentit të Republikës do të bëjë publikisht me dije të gjithë argumentat shteruese kushtetues, ligjorë dhe logjikë që çuan në marrjen e këtij vendimi.
