Pas vendimit të presidentit të Republikës, Ilir Meta, për anulimin e zgjedhjeve lokale të parashikuara për t’u zhvilluar më datë 30 qershor, ka reaguar edhe kreu i grupit parlamentar të Partisë Socialiste, Taulant Balla. Nga qyteti i Elbasanit, ku po zhvillon një takim elektoral, deputeti Balla ka komentuar vendimin e Metës, duke u shprehur se “zgjedhjet nuk i luan as topi, jo Bamir Topi, as Ilir Meta”.
“Parlamenti është legjitim se buron nga zgjedhje legjitime, por është funksional në të gjitha atributet e veta. Këtu nga kjo lagje e nderuar, dua ta them shumë troç, zgjedhjet e 30 qershorit, nuk i luan as topi, jo Bamir Topi, as Ilir Meta, pavarësisht se për Bamirin kam respekt për mënyrën si është sjell si President.”- tha Balla nga Elbasani.
Pas vendimit të kreut të shtetit për anulimin e zgjedhjeve, Ilir Meta, ka reaguar ish-ministri i Drejtësisë, Ylli Manjani.
“E sforcuar por gjëja e duhur, ishte zgjidhja që dha më në fund Presidenti i Republikës.
Ka ndodhur dhe më parë ç’dekretimi i datës së zgjedhjeve, por në kuadër të një proçesi politik. Ndaj them “e sforcuar”.
Deklaratat e tjera kërcënuese të tipit që “ne do i bëjmë zgjedhjet edhe pa dekret”, shpresoj të jenë ende të nxituara…. Ende më ngjajnë si thirrja që ju bëri policëve në 2017 hiqini kapelet e bëni fushatë për PS…
Shpresoj vërtetë të jenë të nxituara për konsum militantësh…
Ende nuk e mendoj dot Kryeministrin si Puçist…”, shkruan Manjani.
Por absolutisht gjëja e duhur. Nuk mund të zbatohej një dekret për mbajtje zgjedhjesh, pa zgjedhje.
Nga ana tjetër, Presidenti është përfaqësues i unitetit të popullit dhe smund të lejojë që ngjarjet e dekretuara prej tij të çojnë në përçarje.
Tani është momenti të fillojnë konsultimet për një datë të re. Shpresoj që këto konsultime të prodhojnë dhe dialogun e munguar.
