Para nisjes së protestës, kreu i opozitës Lulzim Basha ka bërë një tjetër thirrje për qytetarët.
“Protesta, përballja, bashkimi kundër padrejtësisë është e vetmja shpresë për shumicën e shqiptarëve që duan një vend normal, ku qeveria të punojë për ta e jo për krimin. Sonte në ora 19.00 të bashkohemi si asnjëherë me njëri-tjetrin në protestën kombëtare për t’i treguar kryeministrit ilegjitim të avdylajve, se populli ia ka hequr vizën! Asnjë hap pas! #ShqipëriasiEuropa”, shkruan Basha në një shënim në Facebook, teksa shpërndan edhe një video.
“290.000 shqiptare vuajnë për bukë! Ndërsa rruga “Milot-Balldren”, kushton 256 milion euro për 17 kilometra. 15 milion euro për çdo kilometër. Shqipëria nuk është pazari i Ramës! Shqipëria për shqiptarët jo për ata. Asnjë hap pas”, shkruhet në videon e shpërndarë nga Basha.
Opozita zhvillon këtë pasdite protestën e 8 kombëtare në Tiranë, duke kërkuar largimin e Ramës si kryeministër dhe qeverisë së tij, dhe krijimin e një qeverie tranzitore për të garantuar zgjedhje të lira e të ndershme.
Ndërkohë, Rama, në një reagim më herët në Twitter është shprehur: “Vetëm përpara drejt 30 qershorit”.
