Mbi 1500 policë, përfshi këtu edhe efektivë të reparteve speciale të RENEA, FNSH, Shqiponja, por edhe të Gardës së Republikës, janë në gadishmëri për protestën e pasdites së sotme, e thirrur nga opozita në bulevardin “Dëshmorët e Kombit”.
Objektet që merren në ruajtje nga policia janë Kryeministria, Kuvendi, Ministria e Brendshme, ku pritet të dislokohen edhe trupat policore që do të monitorojnë situatën. Në mbështetje të trupave policore do të jenë edhe automjetet me ujë, që janë përdorur kryesisht te Parlamenti për shpërndarjen e protestuesve, sikundër edhe gazi që është hedhur me shumicë kundër tyre.
Protesta, sipas lejes së dhënë nga policia duhet të mbyllet në orën 21:00, por që kjo të ndodhë ka shumë pak gjasa.
Referuar planit të masave që ka ndërmarrë policia, vecc efektivëve të Tiranës, janë angazhuar edhe efektivë të Drejtorive të Policisë nga rrethet.
Rreth Kryeministrisë dhe Kuvendit do të vendosen perimetrat e sigurisë, ndërkohë që është bërë pastrimi i kamerave të sigurisë të vendosura pranë godinave qeveritare, që shërbejnë për qartësi të aktivitetit të protestës, si edhe janë lyer shtyllat me graso që mos të dëmtohen kamerat nga protestuesit.
Vendimi për të mbajtur protestën e sotme u mor menjëherë pas përfundimit të protestës së opozitës më 2 qershor.
Opozita kërkon dorëheqjen e kryeministrit Rama ndërsa u ka bërë thirrje qytetarëve ti bashkohen protestave deri në largimin e qeverisë Rama.
“Nuk do kërkojnë asgjë më shumë, por nuk do të pranojmë asgjë më pak për veten se vlerat që na bashkojnë: demokraci, shtet ligjor dhe drejtësi të barabartë për të gjithë”, tha Basha në protestën e fundit, ndërsa paralajmëroi se koha e fjalëve po mbaron dhe do të jenë qytetarët ata që do të flasin.
