Kryeministri Edi Rama pothuajse në çdo takim që organizon në kuadër të 30 qershorit, datë kur ai do të zhvillojë zgjedhjet pa opozitën, deklaron se kush do të tentojë të prishë procesin nuk do të ketë mundësi të shkojë në vendet e BE dhe SHBA.
Duket se paralajmërimi i bërë nga Rama ka të bëjë me faktin se personat që do të angazhohen për të moslejuar zhvillimin e zgjedhjeve do të ndalohen në pikat e kalimit kufitar nga policia.
Ndoshta kjo do të jetë strategjia që do të ndjekë Rama ndaj qytetarëve që duke mos qenë dakort me zhvillimin e votimeve të 30 qershorit, do t’i skedulojë dhe në pikat e kalimit kufitar nuk do të lejohen.
Të paktën kaq ka në dorë kryeministri, përderisa deklarimet e tij, nuk janë mbështetur nga asnjë ambasadë e vendeve të BE apo SHBA, pavarësisht se ata nuk kanë reaguar kundrejt paralajmërimeve të tilla.
Gjithsesi deri më sot, janë raportuar raste kur persona të ndryshëm janë bllokuar në pikat e kalimit kufitar, me pretendimin se kanë qenë në kërkim policor, kryesisht sepse kanë marrë pjesë në protesta, duke i shkaktuar vetëm një kosto financiare personit që është bllokuar për të kaluar kufirin përkohësisht.
Por duket se një bashki ku edhe paralajmërimet dhe kërcënimet e Ramës nuk pijnë ujë është ajo e Dropullit.
Argjirolajm shkruan se në këtë bashki votuesit kanë nënshtetësinë greke, krahas asaj shqiptare, çka do të thotë se në një situatë hipotetike kur dikush nga Dropulli do të shkaktojë incidente në zgjedhje, edhe pse mund të penalizohet nga nënshtetësia shqiptare, me nënshtetësinë greke s’e ndalon dot askush të lëvizë në vendet e BE-së dhe në SHBA.
