Pak orë nga protesta e tetë kombëtare e opozitës, Gjermania dhe Britania e Madhe bëjnë thirrje për uljen e palëve në dialog.Ambasadorja gjermane në Tiranë, Susanne Schutz shprehet në një deklaratë të shpërndarë për mediat se maxhoranca dhe opozita duhet të nisin dialogun konstruktiv për t’i dhënë fund krizës politike që ka përfshirë vendin. I njëjti apel për dialog vjen edhe nga ambasadori i Britanisë së Madhe, Duncan Norman.
“Ne vazhdojmë t’i bëjmë thirrje të gjitha palëve të angazhohen urgjentisht në një dialog konstruktiv për të kapërcyer situatën aktuale politike”, thuhet në deklaratën e Gjermanisë dhe Britanisë së Madhe.
Deklaratë e Ambasadores Gjermane Schütz
Ndërkohë që respektojmë plotësisht të drejtën themelore të qytetarëve shqiptarë për të demonstruar, ritheksojmë rëndësinë e ushtrimit të kësaj të drejte në mënyrë të rregullt dhe paqësore.
Ne dënojmë të gjitha aktet e dhunshme që kanë ndodhur në protestat e mëparshme. Asnjë formë e nxitjes së dhunës nuk është e tolerueshme. Përdorimi i eksplozivëve ose i ndonjë sendi tjetër të projektuar për të shkaktuar lëndime është krejtësisht i papranueshëm. Është përgjegjësi e drejtuesve të protestës të sigurojnë që demonstrimet të mbahen në mënyrë të sigurt si për pjesëmarrësit ashtu dhe për banorët e tjerë Tiranës, si dhe për të shmangur çdo përshkallëzim gjatë protestave. Autoritetet e zbatimit të ligjit gjithashtu kanë përgjegjësi për të vepruar me përmbajtje, edhe nëse provokohen.
Ne vazhdojmë t’i bëjmë thirrje të gjitha palëve të angazhohen urgjentisht në një dialog konstruktiv për të kapërcyer situatën aktuale politike.
