Erjon Veliaj, kryebashkiaku i Tiranës, ka tentuar të ironizojë vizitën e kreut demokrat Lulzim Basha në Berlin, por ka bërë një gafë, duke fyer Kishën Katolike.
Veliaj tha se “Lul Basha tha do shkoj në Gjermani dhe do bëhet nami i zi. Do takoj Merkelin, tha, dhe do vij mbështetja e jashtëzakonshme për këto protesta dhe do rrëzojmë Edi Ramën për herën e 20-të.
As Merkelin nuk e takoi, as mbështetje nuk mori. Një shtet serioz si Gjermania deri tani kë ka mbështetur dhe kujt i ka dalë në krah? Edi Ramës apo Lul Bashës? Edi Ramës! Basha shkon një javë para protestës në Gjermani, sillet vërdallë në Berlin e takon një prift, vjen në Tiranë dhe thotë që mora uratën që të shkatërroj Tiranën: kjo është të fyesh inteligjencën, kjo është të tallesh me njerëzit, kjo është të mendosh se njerëzit janë budallenj, hanë bar dhe nuk e kuptojnë që, jo vetëm je askushi, jo vetëm që nuk ke lënë një gjurmë kur ke qenë në pushtet, në Tiranë, por ke lënë vetëm plagë të hapura, duke filluar nga rruga Durrës Kukës, tek 21 janari, tek falja e detit dhe në fakt ka vetëm një parti që jo vetëm nuk fal detin por mban edhe premtimet e aleatëve që kanë ikur në rrugë të gabuar”, tha Veliaj.
Në fakt Basha në Berlin u takua me Ambasadorin e Vatikanit, Nuncin Apostolik Mons. Dr. Nikola ETEROVIĆ.
Nuk dihet nëse Veliaj këtë gafë e ka bërë për shkak të vapës, apo për shkak të halleve që po kalon Rilindja, pasi gazeta më e madhe në Europë, BILD, publikoi 6 përgjime nga dosja 339, në njërin prej të cilave shfaqej Vangjush Dako duke folur në telefon me Astrit Avdylin, pavarësisht se kryebashkiaku i Durrësit ka ngritur hipotezën se s’ka folur me atë, por me dikë tjetër.
Ndërkohë gafa e dytë e Veliajt ka lidhje me atë që Berlini mbështet Edi Ramën.
Jo më larg se ditët e fundit nga Berlini i është bërë e qartë Tiranës zyrtare se nuk do të ketë hapje negociatash, ndërsa po nga Gjermania janë dhënë sinjale të qarta për të çuar para drejtësisë personat që janë përfshirë në korrupsionin zgjedhor, pra në shit-blerjen e votave.
Ndoshta sinjalet që kanë ardhur nga Berlini ose s’kanë mbërritur ende te Erjon Veliaj, ose ai i është rikthyer kohës kur shkonte në Bruksel dhe tregonte histori horror për rrëmbime dhe përdhunime.
