Vangjush Dako dhe Agron Duka, kryetar i PAA-së dhe një nga kandidatët për deputet të opozitës në listën e qarkut të Durrësit për zgjedhjet e 2017-ës, kanë shkëmbyer akuza në distancë mes tyre.
Shkak janë përgjimet e publikuara te “BILD”, ku sipas njërit prej materialeve, Dako bisedon me Astrit Avdylajn, ndërsa kryebashkiaku e mohon që të ketë folur në telefon me atë.
Gjatë deklarimeve në emisionet ku ka qenë i ftuar, Dako duke mbrojtur veten nga akuzat, ka përmendur disa herë emrin e Agron Dukës, sipas tij edhe ky i implikuar në shitblerjen e votave me Abdylajt.
Por në një postim në rrjet, Duka nuk ka lënë pa përgjigje akuzat e Dakos.
“Kush je ti dhe çfarë të kanë bërë ata ty (fizikisht dhe moralisht) e di unë, e di Durrësi dhe tani e di gjithë Shqipëria. Megjithatë mos u bëj merak, fundi është afër dhe është më i ëmbël se tmerri pa fund që ke përjetuar këto kohë!”, shkruan Duka.
