Vendimi i sotëm i Presidentit Ilir Meta, për shtyrjen e datës së zgjedhjeve, krijoi idenë e një hakmarrje të fortë të Ramës, i cili mund të shkonte deri në shkarkimin e presidentit.
Madje për të forcuar bindjen në opinionin publik se Rama ka fuqinë të shkarkojë Metën, kryeministri nxori edhe ‘lolon’ e tij Alfred Peza që të deklaronte në Facebook se presidenti duhet shkarkuar menjëherë pas kësaj ‘Lajthitjeje’.
Por në asnjë moment kryeministri dhe parlamenti nuk mund të shkarkojnë presidentin Ilir Meta për shkak se ai vendosi të shtyjë datën e zgjedhjeve për të shmangur luftën civile mes shqiptarëve, pasi këtë në radhë të parë nuk e lejon ligji dhe Kushtetuta.
Në kushtetutë përcaktohet qartë dhe saktë se presidenti i republikës mund të shkarkohet në rastin kur ai bën shkelje të rëndë Kushtetuese (Në rastin konkret është e drejtë legjitime e Presidentit shtyrja e datës s zgjedhjeve) dhe në rast se bën një krim të rëndë (Shmangja e luftës civile nuk është krim).
Po në Kushtetutë theksohet gjithashtu se edhe nëse Kuvendi miraton shkarkimin e Presidentit, ky vendim i dërgohet Gjykatës Kushtetuese duke i provuar fajësinë e Presidentit, por që në rastin konkret në Shqipëri nuk ka më Gjykatë Kushtetuese falë paaftësisë së kryeministrit Edi Rama.
Ja çfarë thuhet në Kushtetutë për rastin se kur shkarkohet Presidenti i Republikës:
1.Presidenti i Republikës nuk ka përgjegjësi për aktet e kryera në ushtrim të detyrës së tij.
2.Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë.
3.Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij.
Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra. /Boldnews.al.