Partizani prej dy vitesh “qan” largimin e Kaleb Ekubanit, i cili me fanellën e kuqe arriti të shpërthejë dhe e përdori aventurën në Shqipëri si një trampolinë për të kaluar në Angli te Lidsi dhe më pas tek Trabzonspor në Turqi.
Të kuqtë pas dy vitesh shpresojnë që mbiemri Ekuban të jetë sërish pjesë e klubit, por kësaj radhe nuk bëhet fjalë për rikthimin e Kalebit, por për afrimin e vëllait të tij, Jozefit. “Panorama Sport” ka mësuar se drejtuesit e kuq po punojnë që të afrojnë në ekip sulmuesin 19-vjeçar, Jozef Ekuban, i cili është në pronësi të Veronës.
Në sezonin e fundit sulmuesi ka qenë i huazuar te Mantova në Serinë D. Jozef Ekuban luan si sulmues qendre, pozicion që ka mbetur bosh që nga ikja e vëllait të tij nga Partizani. Mësohet se klubi ka nisur bisedimet me lojtarin dhe klubin e Veronës që 19- vjeçari të nisë një aventurë të re në Superiore. Bisedimet janë në rrugën e duhur dhe për këtë kalim Jozefi ka pyetur edhe të vëllanë, që kaloi një eksperiencë të bukur njëvjeçare te “demat”.
Ish-sulmuesi, i cili aktualisht luan te Trabzonspori në Turqi, e ka rekomanduar të vëllanë që ta vlerësojë këtë shans, pasi mund t’i shërbejë Ekubanit të ri për të shkuar në gjurmët e tij. Sa u përket marrëdhënieve me klubin italian, pritet që të mos ketë probleme, pasi në këtë transferim mund të luajë rol edhe ish-drejtori Dritan Dervishi, i cili është skaut i skuadrës veroneze.
Ndaj, gjasat janë që Jozef Ekuban të jetë një nga përforcimet e Partizanit të sezonit të ri. 19-vjeçari mund të vijë si i huazuar në Shqipëri, por mund të ketë edhe ndonjë klauzolë për të blerë kartonin e tij, apo për të mbajtur përqindje në rast transferimi në ndonjë klub tjetër pas aventurës me Partizanin.
