Vetingu/ KPK nuk heton “abuzimin” me kredinë e butë të Enkeledi Hajros

Nga Boldnews.al

Komisioni i Pavarur i Kualifikimit (KPK) konstatoi disa problematika në kriterin e pasurisë për kryetaren e gjykatës së Tiranës, Enkeledi Hajro. Për disa vite, gjyqtarja nuk mbulonte shpenzimet me të ardhurat e saj, ndërkohë që kishte disa dyshime mbi transaksionet për blerjen e një apartamenti në vlerën 82 mijë euro dhe dy automjeteve.

Por, pavarësisht këtyre problematikave, relatori Roland Ilia i prezantoi si “lapsuse” të paqëllimshme. Në këtë mënyrë, ai duket se paralajmëroi konfirmimin në detyrë të Enkeledi Hajros. Nëse vendimi, i cili pritet të jepet ditën e Premte, do të jetë në favor të Hajros, kjo do të jetë një dëshmi e radhës se KPK aplikon standarte të shumëfishta për subjektet me probleme të ngjashme.

Apartamenti
KPK konstatoi se Enkeledi Hajro dhe bashkëshorti i saj kanë nënshkruar një kontratë fiktive për blerjen e një apartamenti 85 m2, me vlerë 82 mijë euro, në vitin 2007. Për këtë apartament, ajo ka deklaruar se e ka blerë me kredi 70 mijë euro, ndërkohë që nuk shprehet aspak për diferencën prej 12 mijë euro.

Nga deklarimet e kryegjyqtares së Tiranës, vlera reale e apartamentit është 70 mijë euro. Por ajo, në bashkëpunim me shitësin, e ka rritur në mënyrë fiktive çmimin, duke e shënuar 82 mijë euro. Kjo manovër, sipas saj, është realizuar për të justifikuar marrjen e kredisë 70 mijë euro, pasi bankat nuk japin kredi më shumë se 70-80 përqind të vlerës së pasurisë që do të blihet.

Për këtë manovër, relatori i çështjes, Roland Ilia, deklaroi se “subjekti konfirmoi si vlerë reale të apartamentit vlerën 70 mijë euro dhe si burim krijimi kredinë e marrë”, pa vendosur asnjë pikëpyetje mbi transaksionin.

Kredia
Gjithashtu, gjatë seancës dëgjimore, KPK nuk evidentoi asnjë problematikë në “abuzimin” që gjyqtarja Enkeledi Hajro ka bërë me një kredi të butë, në vitin 2012.

Qeveria shqiptare prej vitesh aplikon një skemë rimbursimi kredie për zyrtarët e lartë, të cilët janë të pastrehë. Nëpërmjet këtij programi, zyrtarët e pastrehë marrin kredi në një bankë të nivelit të dytë dhe paguajnë vetëm 4% interes. Ndërkohë që pjesën tjetër të detyrimit (kredisë) e paguan shtetit.

LEXO EDHE  Të tjerët u bënë me sekretare e shoferë, ti ike me duar në xhepa/ Ish-deputeti mesazh të ndjerë për Fatos Baxhakun

Për të përfituar këtë lloj kredie, duhet që zyrtari të jetë i nivelit të mesëm e të lartë administrativ dhe të jetë i pastrehë.

Gjyqtarja Enkeledi Hajro, e cila në vitin 2012 ka qenë drejtoreshë në Ministrinë e Drejtësisë, ka përfituar një kredi të butë si e pastrehë, pavarësisht se ajo kishte blerë apartament që në vitin 2007.

Sipas deklaratave të pasurisë, Hajro e ka shfrytëzuar kredinë e butë për të shlyer pjesën më të madhe të kredisë tregtare, të cilën e kishte marrë që në vitin 2007. Në këtë mënyrë, Enkeledi Hajro ka shfrytëzuar në mënyrë të padrejtë kredinë e butë.

Por, KPK nuk e ka përmendur aspak këtë skemë në seancë dëgjimore, duke e lënë të kuptohet se për trupën e komisionerëve nuk ka problem ky manovrim i kryegjyqtares së Tiranës.

Kjo sjellje dëshmon një tjetër rast aplikimit të standarteve të ndryshme, të cilat udhëheqin Komisionin e Vetingut në punën e tyre.

Për një rast të ngjashëm me kredi të butë, KPK vendosi shkarkimin nga detyra të gjyqtarit të E.M..

Në rastin e E.M, KPK i konsideroi të parregullta lëvizjet që gjyqtari kishte realizuar me një kredi të butë. Duke bërë një analizë të detajuar, gjithësesi të kundërshtuar nga gjyqtari E.M, Komisioni i Vetingut vendosi shkarkimin e tij nga detyra.

Ndërkohë që, për rastin e Enkeledi Hajro, trupa e komisionerëve nuk u shpreh aspak për “abuzimin” me kredinë e butë.

Kryetarja e Gjykatës së Tiranës doli në seancë dëgjimore në datë 6 Qershor, para komisionerëve Roland Ilia, Valbona Sanxhaktari dhe Olsi Komici. Vendimi për Enkeledi Hajron pritet të shpallet të Premten, datë 7 qershor, ora 9.00.