Në një kohë kur vendi zien nga përgjimet e dosjes 339 të publikuara nga presitigjozja gjermane BILD, që tregojnë bashkëpunimin me krimin të zyrtarëve të PS-së, të cilët të nënshtruar, marrin urdhra nga persona me precedentë të theksuar kriminalë për të ndikuar në votime, nga Rilindja nuk shfaqet asnjë shenjë pendese. Jo vetëm kaq, por reagimet që vijnë nga zyrtarët e PS shfaqin arrogancë, sikur të jenë jo të zgjedhur nga populli për ti qeverisur, por një fuqi pushtuese që kërkon të mbajë vendin nën kthetrat e saj me çdo kusht dhe pakokëçarje për moral e përgjegjësi.
Deri më tani, asnjë nga Rilindja nuk ka dalë hapur të dënojë veprimet e zyrtarëve mavi, që në çdo vend demokratik do të kishin sjellë largimin e qeverisë (kujtojmë rastin e skandalit në qeverinë Kurtz në Austri). Por, maskarada rilindase shkon edhe më tej duke u përpjekur të përçojë propagandën se në vend çdo gjë po shkon për bukuri.
Pas deklaratës delirante se negociatat me Shqipërinë do të hapen këtë vit, duke ia kaluar edhe Ramës që shprehu rezerva për një vendim pozitiv nga KE, Taulant Balla bëhet edhe më qesharak. Kryetari i grupit parlamentar të Partisë Socialiste, një ditë pas përgjimeve të publikuara nga gjermania Bild, gazeta me tirazhin më të madh në Europë, deklaron se Gjermania i mbështet në hapjen e negociatave.
Kështu, përfaqësuesi i socialistëve Taulant Balla, ashtu si shokët rilindas, mbyll sytë para skandalit të madh të kapjes së politikës nga krimi dhe vazhdon ti thotë shqiptarëve se çdo gjë po shkon mirë, edhe pse të qeverisur nga krimi dhe me barkun bosh. Ndoshta ka ndërmend se, nën drejtimin e Ramës ekziston mundësia të bëhet edhe më keq… /Boldnews.al/
