Partia Socialiste e drejtuar nga Edi Rama është shfaqur e vendosur për të shkuar drejt 30 qershorit, ditën kur nga Presidenti janë dekretuar zgjedhjet vendore.
Pa praninë e opozitës, e cila nuk është regjistruar, kandidatët e Rilindjes në pjesën më të madhe të bashkive nuk kanë asnjë emër përballë, ndërsa në disa njësi, garojnë emra të përzgjedhur ose nga Bindja Demokratike e drejtuar nga Astrit Patozi, ose parti kandidatë të pavarur.
Kjo është hera e parë në 30 vite të pluralizmit dhe tranzicionit shqiptar, që zgjedhjet zhvillohen pa opozitën, të cilës nuk iu dha e drejta as të vëzhgojë procesin përmes anëtarëve në KZAZ, me pretendimin se nuk janë subjekte të regjistruara në zgjedhje.
Në fakt në 30 qershor nuk mund të ketë zgjedhje, përderisa s’ka kandidatë apo alternativa. Procesi i 30 qershorit ngjan me votimet që bëheshin në kohën e diktaturës, ku kandidatëve të PPSH, i shtoheshin edhe ato të Bashkimeve Profesionale, Frontit Demokratik.
Nuk është çudi që me 1 korrik, të lexojmë diku që më 30 qershor morën pjesë në votime 99.99 e zgjedhësve, fituan 99.99 % e kandidatëve, ndërsa votuan kundër 3 zgjedhës dhe 1 nuk mori pjesë në votim, ndërsa e gjitha kjo të cilësohet si një fitore e shkëlqyer e vijës revolucionare.
Mos u habisni, gazeta Zëri i Popullit organ i PPSH-së, sot Partia Socialiste, në 12 korrik të 1966, hapej me një titull të tillë.
Ndryshimi i vetëm është që këtë titull mund të mos e gjeni te gazeta zyrtare e PPSH, më pas e PS-së, u mbyll pasi Edi Rama mori drejtimin e socialistëve, por në çdo media tjetër që kontrollohet apo është në shërbim të tij.
