“Po bëhen dy vite që përgjimet kanë qenë aty dhe Prokuroria nuk ka patur interes për t’i zbardhur. Donika Prela është dorëzuar pa kushte dhe është e pafuqishme për ta varrosur këtë dosje”.
Kështu u shpreh në studion e News 24, gazetarja Klodiana Lala, e cila ka komentuar publikimin e 6 përgjimeve nga e përditshmja BILD, lidhur me atë që njihet tashmë si dosja 339.
Lala thotë se Arta Marku dhe Donika Prela u detyruan sot të dorëzohen përballë skandalit të dosjes 339, pas publikimit të audio-përgjimeve nga gazeta gjermane ‘Bild’.
Lala theksoi se pavarësisht se mediat shqiptare kanë publikuar më parë materiale nga kjo dosje, “të gjithë ne jemi dëshmitarë që Prokuroria kishte dhe nuk ka vepruar për t’i zbardhur.”
Reagimin e Prokurorisë së Krimeve të Rënda ku njofton për nisjen e hetimeve për manipulimin e votave në qarkun e Durrësit dhe të Lezhës, Klodiana Lala e konsideron dorëzim pa kushte të Donika Prelës, e cila, sipas saj, ishte e pafuqishme të “varroste” dosjen 339.
Lala kërkoi edhe nga Prokurorja e Përgjithshme e Përkohshme, Arta Marku, që të heshtë dhe të mos bëjë ‘show’ tani që audio-përgjimet u publikuan nga gazeta gjermane.
“Mendoj që Arta Marku nuk ka asnjë rol, do të duhet të heshtë. Ka patur kohën e saj që të insistonte që këto dosje të zbardheshin. Nuk mund të dalë PPP-ja dhe të bëjë shoë pasi përgjimet u publikuan nga një media gjermane”, u shpreh Lala.
Sipas Lalës, dosja 399 tregon fytyrën e vërtetë të shtetit shqiptar.
“Një grup i mirëorganizuar kriminal që ka kapur të gjithë drejtuesit lokal dhe përcakton njerëzit që do të përfaqësojnë qytetarët shqiptarë”, tha gazetarja.
