Urdhëri i Prokurorisë për mos lejimin e publikimit të materialeve hetimore të dosjes 339 nga media është komentuar gjerësisht gjatë pasditës së sotme, dhe në kuadër të kësaj, gazetari Basir Çollaku tha me ironi se uronte që organi i hetimit të mos marrë vendimin që të shpall të mërkurën ditë pushimi.
Çollaku deklaroi në Ora News se e ka takuar personalisht gazetarin e Bild që bëri publike ditën e sotme përgjimet që implikojnë përfaqësues të lartë të qeverisë Rama, si edhe vetë kryeministri që është përmendur në to, duke thënë se gazetari gjerman do të ketë publikime të reja në ditët në vijim.
Pyetje: A ka të drejtë media ta publikojë nëse i bie në dorë një material i këtyre dosjeve?
Basir Çollaku: Uroj që prokuroria të mos nxjerrë një vendim që dita e mërkurë të hiqet nga kalendari dhe ta bëjë javën me 6 ditë për arsye të këtij publikimi.Çdo gazetar në planet nëse i bie në dorë një dokument zyrtar që është në dobi të qytetarit, të publikut le ta botojë dhe sekreti të vejë në djall. Gazetari gjerman është për tu përgëzuar dhe falenderuar por ka nxjerrë dhe disa probleme serioze në Tiranë. Le të themi se nuk kemi parë gjë akoma. E kam takuar Peterin, ka aksesuar shumë informacion. Unë them që ende nuk ka përfunduar investigimi gjerman në Shqipëri. Është premtuar një shkrim i tretë dhe gjermanët gjithmonë e mbajnë fjalën. Këto dosje që gjenden aty ka njerëz që nuk kanë vepruar, nuk kanë bërë detyrën dhe mosveprimi është vepër penale. Kemi një parlament që është prodhuar nga kjo pjesë e dosjes dhe urdhrat i japin ata.
