Nga Boldnews.al
Në filmin “2 herë Mat”, një prej prodhimeve kult të Kinostudios Shqiptare, personazhi Kopi (i luajtur nga aktori i madh, Aleko Prodani) ngatërron listën e lojtarëve pjesëmarrës në simultane shahu me atë të kushërinjve e komshinjve që kishte ftuar për drekë.
Diçka e ngjashme ka ndodhur edhe me Prokuroren e Përgjithshme (të Përkohshme), Arta Marku, e cila ka publikuar listën e 27 fituesve për vendet vakante si Oficer të Policisë Gjyqësore (OPGJ).
Në këtë listë, Arta Marku duket se u ka bërë ;qokat” e radhës miqve e mikeshave të saj në sistemin e drejtësisë, në politikë e “komshinj”.
Në listën prej 27 oficerësh dallohet emri i Armando Felaj, vëllai i deputetes Ermonela Felaj. Pak javë pasi bashkëshorti i deputetes socialiste u bë prokuror me një procedurë anti-ligjore në Këshillin e Lartë të Prokurorisë, tashmë është radha e vëllait të saj të përfshihet në sistemin e drejtësisë nëpërmjet “listës” së Arta Markut.
Lista vijon me Rael Qeleshi, djali i avokatit Arben Qeleshi dhe njëkohësisht vëllai i kryetares së Gjykatës së Durrësit, Joana Qeleshi.
Arben Jorgaqi, ish-oficer i Policisë Gjyqësore në Vlorë, dha dorëheqjen nga kjo detyrë rreth 2 vjet më parë, pasi u transferua në Prokurorinë e Përmetit. Ai u zgjodh ndihmës ligjor në Komisionin e Pavarur të Kualifikimit nga ku, me shumë mundësi, është larguar për të kandiduar për të rimarrë postin e oficerit të Policisë Gjyqësore.
Në listë është edhe emri i Rezart Hanës, djali i prokurorit Xhevat Hana.
Lista vijon me Ibrahim Salikon, djalin e ish-anëtarit të Këshillit të Lartë të Drejtësisë, Hysen Saliko. Një post si oficere ka marrë edhe Esmeralda Xholi, punonjësve prej vitesh në administratën e Prokurorisë së Tiranës.
Ndërsa pjesa më e madhe e listës së mbetur janë “komshinj” të Arta Markut në Shkodër. Shumë prej emrave fitues janë nga qyteti verior. Artor Muja ka qenë avokat në qytet. Bernandin Ndoj ka qenë inspektor tatimesh po në atë qytet.
Gjithashtu, nga Shkodra janë edhe disa emra të tjerë vijues të listës. Mesa duket, të qënit nga Shkodra, qytet ku ka punuar dhe jetuar për shumë vite Arta Marku, duhet të ketë pasur prioritet në “konkursin” e zhvilluar nga Prokurorja e Përgjithshme e Përkohshme.
Institucioni i Prokurorisë hapi garën për plotësimin e vendeve vakante për oficer të Policisë Gjyqësore rreth 1 muaj më parë.
Ligji për Prokurorinë i ka caktuar Prokurorit të Përgjithshëm kompetencën për zgjedhjen dhe kontrollin e oficerëve të Policisë Gjyqësore.