Kryetarja e LSI ka reaguar paraditen e sotme, disa orë para protestës së paralajmëruar të opozitës së bashkuar.
Përmes një postimi në Facebook, ajo i ka bërë thirrje të gjithë shqiptarëve për t’ju bashkuar në këtë tubim kundër asaj që Kryemadhi e konsideroi si ‘e keqja më e madhe e Shqipërisë’ qeverisë së drejtuar nga Edi Rama.
Mesazhi i plotë
Sot më shumë se kurrë, Shqipëria ka nevojë për forcën e protestës qytetare, ka nevojë që të gjithë bashkë të dëshmojmë se e ardhmja e fëmijëve tanë nuk mund të jetë peng i papërgjegjshmërisë së Edi Ramës!
Sot është dita e qytetarëve.
Prandaj të gjithë bashkë,
pa asnjë dallim në jemi të rinj apo të moshuar,
burra apo gra,
nga fshati apo nga qyteti,
nga Jugu a nga Veriu,
me apo pa parti,
të majtë apo të djathtë,
të jemi bashkë në protestën e shpresës, sepse e keqja po shembet dhe se e nesërmja bëhet më e mirë, vetëm kur qytetarët i dalin zot fatit të tyre!
Shqipëria pa varfëri dhe me punë të ndershme, pa korrupsion e në luftë me krimin e organizuar, pa drogë e oligarkë, por me njerëz që e duan familjen dhe atdheun e konsiderojnë shtëpinë e tyre, është më e rëndësishme, më e madhe dhe më e fortë se Edi Rama dhe klani i tij kriminal!
Sot më shumë, sot më të vendosur, sot më të fortë, sot më të bashkuar!
