Situata e paparashikueshme sinoptike në vendin tonë, ka sjellë jo vetëm shqetësime në shëndetin e shumë njerëzve, por edhe në fusha të tjera. Shirat e rrëmbyeshëm dhe breshëri që ka rënë gjatë javëve të fundit, që ka shoqëruar thuajse të gjithë stinën e pranverës, ka bërë që të shënohen edhe dëme të pallogaritshme në fushën e bujqësisë.
Shumë prej arave dhe fermave në vend janë dëmtuar. Reshje të dendura shiu dhe breshëri përfshinë disa fshatra dhe qytetin e Elbasanit pasditen e djeshme.
Stuhitë ishin aq të forta sa breshëri zbardhi vendin dhe dëmtoi mjaft të mbjella, vreshta, perime dhe dru frutorë. Sipas raportimeve të ardhura nga fshatrat, rezulton se kjo stuhi ka shkaktuar mjaft dëme në bujqësi për shkak se gjithçka, tashmë ndodhet në fazën e pjekjes.
Sipas banorëve të fshatit, dëmi është i pallogaritshëm, pasi ky është momenti kur qershitë vilen dhe dalin në treg.
