Partia Socialiste do të çelë pasditen e sotme fushatën për zgjedhjet vendore të 30 qershorit, në një situatë të tensionuar dhe krize politike.
Hapja e fushatës do të bëhet te Parku Olimpik në Tiranë, ku përveç drejtuesve kryesorë të Rilindjes, kandidatëve për kryebashkiakë dhe kandidatëve për këshillat bashkiakë, do të jenë të pranishëm edhe punonjës të administratës shtetërore.
Kjo të paktën sipas denoncimeve, ku veçanërisht në institucionet nën varësinë e Bashkisë së Tiranës, është dhënë një urdhër i prerë për të qenë të pranishëm në orën 16:00 në çeljen e fushatës së Partisë Socialiste.
Në eventin që Rilindja do të mbajë sot, pritet një prezantim i kandidatëve për kryebashkiakë, ndërsa disa prej tyre do të mbajën fjalime të shkurtra. Këtu duket se janë zgjedhur kandidatët që do të garojnë në bashkitë që sot drejtohen nga opozita, PD dhe LSI.
Vëmendja kryesore do të përqëndrohet te Kryeministri Edi Rama dhe kryebashkiaku i Tiranës, Erjon Veliaj, i konsideruar shpesh si pasardhësi politik i kreut aktual, në Partinë Socialiste.
Nuk dihet nëse sot Veliaj do të sfidojë Ramën përmes fjalimit të tij, por si kryeministri ashtu edhe kryebashkiaku e kanë të qartë se kriza politike dhe mungesa e opozitës në zgjedhje, është në disfavorin e tyre, qoftë në aspektin ndërkombëtar ashtu edhe në imazh, të cilin veçanërisht kreu i bashkisë e kuron me kujdes.
Në kongresin e fundit të socialistëve, Veliaj, të paktën mediatikisht e sfidoi hapur Ramën, edhe pse pa suportin e tij, vështirë se mund të realizojë ndonjë projekt për të marrë drejtimin e PS-së.
Në fjalët e tij kryeministri Edi Rama pritet të rikthesojë se për socialistët këto zgjedhje janë një bast që duhet fituar përballë PD dhe LSI të cilat nuk marrin pjesë në zgjedhje, por kanë deklaruar se më 30 Qershor nuk do të ketë zgjedhje pa opozitën.
Për mbështetësit e PS që duan ta ndjekin nga afër çeljen e fushatës, jashtë sallës kryesore të parkut olimpik do të vendosen dy ekranë gjigantë.
