Mosmarrëveshjet mes kryeministrit Edi Rama dhe ish-kryediplomatit Ditmir Bushati duket se nuk janë sheshuar ende.
Ashtu siç e ka kthyer në zakon, në faqen zyrtare në Facebook të shefit të ekzekutivit, çdo të enjte, shpërndahen fjalimet në parlament të deputetëve dhe ministrave socialistë.
Kështu ndodhi edhe këtë të enjte. Në faqen e shefit të qeverisë në rrjetin më të madh social, u shfaqën me zë dhe figurë fjalimet e Taulant Ballës, kryetarit të grupit parlamentar të PS-së, Olta Xhaçkës, ministres së Mbrojtjes, Ogerta Manastirliut, ministres së Shëndetësisë e Mimi Kodhelit, deputetes socialiste dhe ish-ministres së Mbrojtjes.
Në sallën e Kuvendit foli edhe një ish-ministër i qeverisë Rama, Ditmir Bushati.
Por, mesa duket, porosia për zyrën e PR-it që menaxhon aktivitetin në faqen në FB të shefit të ekzekutivit, ka qenë e qartë: Ish-kryediplomati Ditmir Bushati duhet të censurohet…
Përplasjet mes Ramës dhe Bushatit kanë filluar muaj më parë, deri sa arritën në ‘pikën e vlimit’ kur Bushati u shkarkua nga posti i Ministrit të Jashtëm nga shefi i tij politik. Në vend të Bushatit u emërua Gent Cakaj. Emri i këtij të fundit nuk e dekretua nga Presidenti Meta duke sjellë edhe një përplasje institucionale Kryeministri-Presidencë, megjithatë Rama gjeti rrugën që Cakaj, i cilësuar nga Rama si “njeriu i lexuar” (megjithatë deri më tani janë parë gafa të bujshme) të vendohej në krye të Ministrisë së Jashtme. Rama emëroi vetëm kryediplomat dhe pas dekretimit nga Presidenti ia kaloi kompetencat Cakajt. /bn/
