Kryeministri Edi Rama, ish-kryeministri Sali Berisha dhe Presidenti i Kosovës, Hashim Thaçi, do të jenë mbrëmjen e sotme në studio televizione, sit ë ftuar në emisionet e mbrëmjes.
Rama do të jetë në ekranin e TCH të drejtuar nga Ben Blushi, i cili është vënë në shërbim të ish-shefit të tij, edhe pse ky i fundit e zboi nga Partia Socialiste. Kryeministri pritet të flasë për situatën politike në vend, letrat drejtuar Lulzim bashës, krizën politike, rekomandimin për negociatat, apo edhe për ndryshimin e kufijve mes Kosovës dhe Serbisë, një tezë që e ka mbështetur.
Berisha është i ftuar në Presing tek T7 në Kosovë përballë Leonard Kërqukit dhe Berat Buzhalës. Në një intervistë pothuajse 90 minuta, Berisha pritet të bëjë deklarata të forta lidhur me idenë për shkëmbime territoresh, të cilën e ka kundërshtuar fort, ndërsa ka akuzuar Hashim Thaçin dhe Edi Ramën si argatë të Aleksandar Vuçiç.
Ndërkohë raportohet se Hashim Thaçi do të jetë prezent në studion e RTV Dukagjini, në emisionin Debat Plus. Nuk dihet nëse Thaçi e ka pasur të programuar praninë e tij në studionin e emisionit Debat Plus, apo ai ka lëvizur gurët për të qenë diku i pranishëm, pasi është njoftuar intervista me ish-kryeministri Berisha, një prej kundërshtarëve më të ashpër të linjës së Thaçit.
Të tre politikanët pritet të krijojnë një garë audience, por jo vetëm. Berisha pritet të artikulojë akuzat e forta ndaj Ramës dhe Thaçit, të cilët pritet t’i përgjigjen në distancë duke pasur parasysh edhe faktin se do të jenë të pranishëm në studio ku janë të ftuar rreth 15 minuta më vonë se ish-kryeministri dhe lideri historik i PD-së, Sali Berisha.
