Kuvendi i Shqipërisë prej disa muajsh e ka humbur seriozitetin për të cilin është legjitimuar nga qytetarët shqiptarë, duke u shndërruar në një arenë teatrale të shëmtuar.
Çdo të enjte në të gjithë TV-të, prej disa muajsh po shfaqet komedia më e re në vendin tonë ’Parlamenti shqiptar’, me regji të Gramoz Ruçit, dhe pjesëmarrjen e jashtëzakonshme të trupës teatrale, Edi Rama (në rolin e kryeministrit), Elisa Spiropali (Në rolin e ministres për marrëdhëniet me parlamentin), Myslym Murrizi (Në rolin e opozitarit) dhe me Kujtim Gjuzin (Luan disa role njëherësh).
Seancat plenare sot e kanë humbur totalisht debatin intelektual dhe diskutimin serioz të gjërave, pasi të pranishmit në sallën e ligjeve e kanë kthyer atë në një estradë amatorësh, fiks si në kohën e diktaturës, kur të rinjtë nga qyteti jepni shfaqe në fshat para fshatarëve, pasi këta kishin tejkaluar me 127.3 për qind planin për mbjelljen e grurit dhe mbarështimin modern të lopëve dhe gjedhit.
Ajo që e bën më të turpshme seancën plenare nuk është vetëm diskutimi pa nivel i deputetëve të rinj e të vjetër të Kuvendit të Shqipërisë, por edhe ligjet që kjo mazhorancë çon për votim çdo të enjte.
Këtë të enjte palët unanimisht votuan ligjin që kush vret kafshë dënohet me burg, ndërkohë që nuk ka ende asnjë ligj mbrojtës, ndaj qytetarëve që ju rrezikohet çdo ditë jeta nga qentë e rrugëve.
Por humori i estradës popullore nuk mbaron këtu, pasi kulmi arrin kur në skenë ballafaqohen dy rrobaqepësit e vjetër Gjuzi dhe Rama, të cilët e kanë ende të pazgjidhur sherrin e tyre të rinisëm, se kush i qepte dhe i shkepte pantallonat njëri-tjetrit.
E në kulmin e krizës politike, por edhe të pritjes së përgjigjes nëse Shqipërisë këtë vit do t’i hapen apo jo negociata me BE-në, nuk ka si të mos mungojë dhe Marlin Monro (Brune) e Rilindjes, vetë Elisa Spiropali, e cila në çdo fjalim të sajin në foltoren e parlamenti, flet për gjithçka, yllin që shndrit në qiell Edi Ramën, Skënderbeun modern, të bukurin e dheut, por nuk ka thënë as edhe një fjalë për shqiptarët që largohen çdo ditë nga vendi, apo se ku shkuan 5 milionë eurot e doganës.
Por në këtë komedi kaq të madhe, peshën kryesore e mban ai, Gramoz Ruçi, njeriu që e njeh mirë komedinë amatore, pasi dikur ka qenë dhe ai pjesë e trupës së estradës që jepte shfaqej në fshat, pas realizimit të planit për mbarështimin modern të lopëve.
Nuk na ngelet gjë tjetër për të shtuar veçse të presim të enjten e ardhshme që si popull të gajasemi me hallet tona. /Boldnews.al
