Skënderbeu, pasi ka mbyllur sezonin, pret zhvillimet që vijnë nga merkato. Dhe duhet thënë se hyrjet dhe daljet janë të lidhura ngushtë me Europën dhe KAS-in. Nëse ekipi siguron pjesëmarrjen në zonën “Euro” dhe Lozana jep përgjigje pozitive, atëherë edhe plani i korçarëve do të ndryshojë katërçipërisht. Por, në kushtet kur ende asgjë nuk dihet se çfarë do të ndodhë me sezonin e ardhshëm, bardhekuqtë duket se janë të përqendruar te rindërtimi i grupit aktual.
Pas 10 lojtarëve që janë drejt skadencës së kontratës, në skenë del edhe emri i Bruno Lulajt. Mbrojtësi i rikthyer nga dëmtimi fitoi jo vetëm një vend titullari, por ofroi edhe garanci për prapavijën. Paraqitjet e mira e kanë vënë nën vëzhgimin e klubeve të Superiores, por edhe greke e qipriote. Këta të fundit kanë kërkuar kontakte me klubin pak javë më parë, ndërsa burime të sigurta të gazetës bëjnë me dije se në ndjekje të mbrojtësit është venë edhe Flamurtari.
Me lojtarin që kontrata i mbaron më 30 qershor, nëse nuk vjen rinovimi, Lulaj mund të largohet me parametra “zero”. Gjithsesi, burime nga klubi bëjnë me dije se mbrojtësi është pjesë e projektit të Skënderbeut për sezonin e ardhshëm. Dhe si i tillë, ai është njoftuar që do të jetë pjesë e Skënderbeut me nisjen e sezonit, por edhe në grumbullimin që nis në Durrës në datën 11 qershor.
SHEHI – Orges Shehi shpreson që të marrë fund dënimi absurd i UEFA-s. Trajneri i Skënderbeut, në një deklaratë të dhënë për “RTSH Sport”, veç objektivave, publikoi datën e fillimit të fazës përgatitore dhe komentoi për përgjigjen e KAS-it. “Gjithë punën tonë e kemi drejtuar nga e ardhmja, duam Kupat e Europës dhe të hiqet ai dënim absurd. Duke qenë se ne arritëm të sigurojmë një vend në Europë, presim të qetë vendimin e KAS-it. Në datën 11 qershor fillojmë fazën përgatitore, prandaj shpresoj që përgjigjja e KAS-it të dalë para kësaj dite. Ndërsa, lojtarët e huazuar do të rikthehen fillimisht te skuadrat e tyre, më pas do të shohim”, deklaroi durrsaku i stolit korçar.
