Kolegji Zgjedhor ka lënë në fuqi vendimin e KQZ-së për të mos regjistruar Fredi Bejlerin si kandidat për kryebashkiak të Himarës.
Bejleri ka thënë se respekton vendimin e Kolegjit Zgjedhor, por ka paralajmëruar se do e çojë çështjen deri në Gjykatën e Strasburgut.
Bejleri ka komentuar dhe zgjedhjet e 30 qershorit për të cilat tha se nuk mund të zhvillohen me një kandidat.
“Do ketë zgjedhje? Zgjedhjet me një kandidat nuk janë zgjedhje, shpresoj që të mos të kthehemi në kohën e komunizmit”, tha Bejleri.
Duke folur për marrjen në pyetje në Prokurorinë e Krimeve të Rëndë, pasi akuzohet se ka lidhje me masakrën e Peshkëpisë, Bejleri tha se nuk kishte lidhje as me këtë çështje dhe as me ndonjë ngjarje të tillë, pasi i quajti ato si akuza politike.
“S’kam lidhje as me ngjarjen e Peshkëpisë dhe asnjë çështje tjetër terroriste. Kjo është një çështje politike që po sorollat prej 25 vitesh”, tha Bejleri.
Ngjarja për të cilën Fredi Bejleri është marrë në pyetje nga Krimet e Rënda ka ndodhur në vitin 1994.
Në prill 1994, posta e Peshkëpisë u sulmua nga organizata Mavi , ku edhe mbetën të vrarë ushtarakët, Fatmir Shehu dhe Arsen Gjini, si dhe u plagosën tre të tjerë.
Në listën e të dyshuarve si terroristë janë 7 emra mes tyre, Jorgo Anastasulis një oficer grek , Apostolis Karvelas polic grek , por mes këtyre emrave është edhe emri i Fredi Bejlerit që në atë kohë ishte 23 vjeç.
Një vit pas këtij sulmi, grupi i drejtuar nga komando, me nofkën Pirro i parë, organizoi një sulm të dytë ndaj një tjetër reparti në Shqipëri, dhe pas reagimit në kohë të palës shqiptare, grupi u ndalua nga pala greke ku edhe u zbulua identiteti i tyre si dhe u arrestuan për armë mbajtje pa leje. Për këtë episod, Bejleri nuk dha asnjë koment.
