Boldnews.al
Nuk mban më! Ka kapërcyer çdo etikë mbi përdorimin e imazhit të fëmijëve, por kohët e fundit e ka tepruar në çdo drejtim, duke u kthyer në rrezik serioz për shkeljen dhe të drejtat e të miturve në çerdhe, kopshte dhe shkolla fillore.
Kryetari i Bashkisë së Tiranës në ditën e sotme ka postuar katër herë, brenda gjashtë orëve të fundit imazhe dhe video me fëmijë të mitur. Propaganda e tij nuk njeh asnjë kufi, etikë, kod familje, gjest human, apo stepje për të menduar se po shkel mbi të drejtat e të miturve të cilët nuk duhet të afishohen në rrjetet sociale, sidomos nga përdorimi politik.
Në postimin e parë, në krye të faqes, ka shkëputur një pjesë nga programi: “lot, para dhe propagandë”, ku shfrytëzohet varfëria e fëmijës Xhejson Bafti. Padyshim aty vjen Lali Eri si një “shpëtimtar” i tij, fëmija tërësisht i padjallëzuar dhe në botën e ëmbël, loton para kreut të Bashkisë së Tiranës. Propaganda u arrit. Lali mori kredo, zuri hapësirën publike televizive dhe bëri lëmsh kokat e votuesve.
Maniakëria e propagandës së Erit nuk mbyllet me aq. Vetëm një orë më vonë, poston sërish në Facebook. “Çfarë do gatuajmë për 1 Qershor te sheshi “Skënderbej”?.. -“Shefat e vegjël do të gatuajnë në shesh pjatat me ushqimet me të mira bio të Tiranës. Merr familjen dhe eja, asnjë shfaqje gatimi nuk krahasohet më atë që fëmijët do dhurojnë këtë të shtunë. Të presim!”-shkruan Erion Veliaj.
Kjo shoqërohet me shumë foto ku fëmijët në botën e tyre mundohen të gatuajnë, por kanë xhelatin e propagandës mbi krye, një aparat fotografik që stampon çdo pamje të tyre dhe në fund përfundojnë në duart e kryebashkiakut që përzgjedh imazhet që i leverdisin. Pa pyetur mbi të drejtën e fëmijëve për të mos u publikuar, pa marrë një autorizim me shkrim nga prindërit e tyre për përdorim imazhi, e sigurisht as që pyet për ligjin që mbron të miturit.
Histerizmi dhe maniakëria nuk ka fund për Lali Erin. Në seri, po sot hedh edhe dy postime të tjera. “Po po Kryetar, fol ti, gri sallatë! Më 1 Qershor – ditën pa makina, i gjithë fokusi është tek fëmijët me dhjetëra aktivitete në Tiranë”-shkruan ai, ndërsa postimin e shoqëron në ballinë me një djalë jo më shumë se pesë vjeç.
Dhe në fund sa për “relaks” hedh një video me fëmijë që rrëshqasin në një “investim madhor” të bashkisë, që mund të ketë kushtuar sa dy pisha, 11 mijë euro… Me pjesën e korrupsionit dhe përdorimit të imazhit të fëmijëve nuk merret askush.
Televizionet kryesore të vendit janë vënë në garë se kush të shpëlajë “fytyrën” e podrosur nga gropat e aferave dhe skandaleve që mbajnë krye në bashki.
Kur nuk mjafton dalja e tij në çdo lloj emisioni, veçanërisht me fëmijë, atëherë futet propaganda personale në profilin e tij në Facebook. Për arsye etike, Boldnews.al nuk po i publikon pamjet e të miturve, për të ruajtur sadopak përdorimin mediatik, por mjafton që çdo përdorues internet të futet në faqen zyrtare të kryebashkiakut të Tiranës Erion Veliaj për të kuptuar të vërtetën. Minimalisht i duhen “lidhur” duart Lalit ose stafit që çdo ditë përdor imazhin e fëmijëve në një perversitet propagandistik.
