Skënderbeu ka mbyllur para kohe sezonin, për shkak se në javën e fundit në kalendar i rezervohej përballja me Kamzën, një ndeshje që e fiton në tavolinë 3-0. Tashmë, në klubin korçar janë në ankth për vendimin që do të marrë KAS, pikërisht më 21 qershor. Por, në të njëjtën kohë, te Skënderbeu presin të mësojnë edhe sesi do të shkojnë gjërat për zonën europiane, pasi korçarët janë të varur nga rezultatet e rivalëve në javën e fundit. Mirëpo, një situatë jo e mirë është me kontratat, sepse pas përfundimit të sezonit, Skënderbeu e gjen veten me 10 lojtarë të lirë nga grupi aktual. Një gjë e tillë pritet që të krijojë një lëvizje të shpejtë në merkato nga ana e korçarëve.
SITUATA – Me 10 futbollistë në fund kontrate, klubi ka nisur të bëjë plane, por që shumë gjëra varen nga vendimi i KAS. Ndër emrat e parë në listë pa dyshim që qëndrojnë “senatorët”. Kapiteni Marko Radas, Kristi Vangjeli dhe Gjergji Muzaka janë lojtarë të lirë pas muajit dhe maj, por klubi do të tentojë të rinovojë me të tre edhe për sezonin e ardhshëm. Nëse Radas dhe Muzaka nuk e kanë fshehur dëshirën për të qenë pjesë e Skënderbeut, sido të shkojë puna, Vangjeli duket i varur nga vendimi i KAS. Pas tre “senatorëve”, radha do të vijë te futbollistët që kanë kontribuuar ndjeshëm këtë sezon.
Pa kontratë është portieri Aldo Teqja, për të vijuar më pas me Leonit Abazin në mbrojtje dhe Oto Xhonin në sulm. Me të tre këta lojtarë do të bisedohet për rinovim dhe kushte të reja. Bisedimet pritet të fillojnë pasi të grumbullohet ekipi më 11 qershor. Në anën tjetër, duket se mesfushorët Zani Kurti dhe Idriz Toskiç do të mbyllin këtu kontratën me Skënderbeun. Të dy lojtarët kanë vuajtur dëmtime të shpeshta dhe nuk kanë treguar potencialin e tyre në këtë 6-mujor. Burime në klub i thanë “Panorama Sport” se mesfushorëve nuk do u ofrohet rinovimi.
/Panorama Sport
