Për më shumë se 150 minuta, kryeministri Edi Rama, ka mbledhur në një darkë informale ministrat dhe deputetët, drejtues politikë në qarqe, lidhur me strategjinë që do të përdorë Partia Socialiste në zgjedhjet e 30 qershorit.
Mësohet se në këtë takim, janë diskutuar detaje mbi ndërtimin e fushatës së socialistëve, megjithëse përballë nuk kanë kandidatë nga opozita, e cila nuk është regjistruar në procesin e zgjedhjeve lokale.
Sikundër raportohet Rama ka diskutuar me drejtuesit e fushatës mbi detajet, përfshi këtu spotet dhe sloganet që do të përdoren.
Duke mos diskutuar aspak mbi mundësinë e shtyrjeve të zgjedhjeve lokale, mësohet se kryeministri ka kërkuar nga të pranishmit që të takohen me qytetarët dhe t’u kërkojnë pjesëmarrje sa më të lartë në procesin zgjedhor.
Socialistët do të garojnë në 60 bashki, ndërsa në njërën prej tyre do të jetë kandidati i MEGA, i mbështetur nga PS.
Në pjesën më të madhe të njësive të qeverisjes vendore, socialistët nuk kanë kandidatë rivalë, ndërsa në disa bashki përballë tyre kandidojnë emra të përzgjedhur nga Bindja Demokratike, apo parti të tjera satelit.
