Ish-mesfushori i Skënderbeut, Sabjen Lilaj, duket se nuk i harron lehtë ngjyrat bardhekuqe. Dje ai ka ndjekur ndeshjen Skënderbeu-Luftëtari, natyrisht nga tribuna kryesore, ku iu bashkua entuziazmit të fitores.
Prania e mesfushorit që mbylli sezonin në Azerbajxhan me klubin e Qabalës, duke fituar aty edhe Kupën, nuk mund të kalonte pa rënë në sy. Në këto kushte, menjëherë pasi përfundoi ndeshja, Lilaj iu përgjigj edhe interesimit të gazetarëve.
“E para dhe më kryesorja është fakti se Skënderbeu të sigurojë përfaqësimin në Kupat e Europës”, tha Lilaj lidhur me një kthim të pritshëm me bluzën bardhekuqe. Ai shtoi se lajmi i mirë që klubi korçar pret nga KAS, ka edhe më shumë rëndësi për rikthimin e tij te Skënderbeu, pasi ka të bëjë me të ardhmen e klubit dhe futbollit korçar.
“Ku i dihet, edhe mund të jem te Skënderbeu për Kupat e Europës”, deklaroi korçari, duke lënë të hapur gjithçka për bisedime menjëherë pasi Skënderbeu të mësojë lajmin nga KAS. Korçari nuk mohoi për asnjë moment se mund të jetë përsëri pjesë e rëndësishme e formacionit të Skënderbeut.
Kontrata e tij me Qabalën ka skaduar, por ai ka një klauzolë që duhet të diskutojë sërish me klubin azer, nëse do të rinovojë apo do ta mbyllë përfundimisht bashkëpunimin. Për Lilajn është interesuar edhe klubi i Shkëndijës së Tetovës, por gjithsesi nuk mund të thuhet se ka diçka konkrete.
Aktualisht lojtari po kalon pushimet në vendlindje, ndërsa ka pritur edhe një ftesë nga Kombëtarja, por me sa duket, këtë herë nuk ka ardhur. Lilaj ka fituar gjithçka me Skënderbeun, por largimi i tij në verën e vitit të kaluar solli jo pak polemika për shkak të një borxhi.
/Panorama Sport
